കേരളത്തെ ഹെൽത്ത് ഹബ്ബാക്കുക ലക്ഷ്യം -മന്ത്രി വീണാജോർജ്

തൃപ്പുണിത്തുറ : ആയുർവേദരംഗത്ത് സ്റ്റാൻഡേഡൈസേഷൻ ആവശ്യമാണെന്നും കേരളത്തെ ഹെൽത്ത് ഹബ്ബാക്കി മാറ്റുക എന്നതാണ് ലക്ഷ്യമെന്നും മന്ത്രി വീണാജോർജ് പറഞ്ഞു. തൃപ്പൂണിത്തുറ ഗവ. ആയുർവേദ കോളേജിന്റെ നൂറാം വാർഷികാഘോഷം 'ശതപൂർണിമ' ഉദ്ഘാടനം ചെയ്യുകയായിരുന്നു മന്ത്രി. നൂറ്റാണ്ടുകളുടെ പാരമ്പര്യമാണ് ആയുർവേദത്തിനുള്ളത്. ആയുർവേദരംഗത്ത് ഗവേഷണം അനിവാര്യമായ കാര്യമാണെന്നും മന്ത്രി വീണാജോർജ് പറഞ്ഞു.

ആയുർവേദ കോളേജിൽ അഞ്ചുകോടി രൂപ മുടക്കി നിർമിച്ച ഫാർമസി കെട്ടിടം, നാഷണൽ ആയുഷ്‌മിഷൻ അനുവദിച്ച 1.40 കോടി രൂപ മുടക്കി നിർമിച്ച ഒപി. ബ്ലോക്ക് തുടങ്ങിയവയുടെ ഉദ്ഘാടനവും മന്ത്രി വീണാജോർജ് നിർവഹിച്ചു.

കെ. ബാബു എംഎൽഎ അധ്യക്ഷനായിരുന്നു. ഹൈബി ഈഡൻ എംപി, നഗരസഭാ ചെയർപേഴ്‌സൺ അഡ്വ. പി.എൽ. ബാബു, ആയുർവേദ മെഡിക്കൽ വിദ്യാഭ്യാസ വകുപ്പ് ഡയറക്ടർ ഡോ. ടി.ഡി. ശ്രീകുമാർ, ആരോഗ്യ ആയുഷ് കുടുംബക്ഷേമ വകുപ്പ് അഡീഷണൽ ചീഫ് സെക്രട്ടറി രാജൻ എൻ. ഖോബ്രഗഡെ, പിഡബ്ല്യുഡി എക്‌സി. എൻജിനിയർ വി.പി. സിന്റോ, സ്റ്റേറ്റ് മിഷൻ ഡയറക്‌ടർ ഡോ. ഡി. സജിത്ത് ബാബു, കൗൺസിലർ ഇന്ദിരാസതീശൻ, ആയുർവേദ കോളേജാശുപത്രി സൂപ്രണ്ട് ഡോ. അബ്‌ദുൾ ഷുക്കൂർ എം.എം., ആയുർവേദ കോളേജ് പ്രിൻസിപ്പൽ ഡോ. സിന്ധു സി. തുടങ്ങിയവർ സംസാരിച്ചു.