കേരളത്തിന്റെ പൊതുവിതരണ സംവിധാനം രാജ്യത്തിന് മാതൃക - മന്ത്രി ജി. ആർ. അനിൽ

39,000 കുടുംബങ്ങൾക്ക് മുൻഗണനാ റേഷൻ കാർഡുകൾ നൽകി

നെടുമങ്ങാട്: രാജ്യത്തിനു മാതൃകയായ പൊതുവിതരണ സംവിധാനം നിലവിലുള്ള സംസ്ഥാനമാണ് കേരളമെന്നും എല്ലാ കുടുംബങ്ങൾക്കും റേഷൻ കാർഡ് എന്ന ലക്ഷ്യം കൈവരിക്കുന്നതിന് ഇക്കാലയളവിൽ പൊതുവിതരണ വകുപ്പിന് സാധിച്ചിട്ടുണ്ടെന്നും മന്ത്രി ജി.ആർ.അനിൽ.

അർഹരായ 39,000 കുടുംബങ്ങൾക്ക് പുതുതായി മുൻഗണനാ റേഷൻ കാർഡുകൾ വിതരണം ചെയ്ത് സംസാരിക്കുകയായിരുന്നു അദ്ദേഹം.

ഈ സർക്കാർ അധികാരത്തിൽ വന്നതിനുശേഷം 5,85,169 കുടുംബങ്ങൾക്ക് പുതുതായി റേഷൻ കാർഡ് അനുവദിച്ചിട്ടുണ്ട്. 1,25,326 മുൻഗണനാ കാർഡുകളും 4,45,610 പൊതുവിഭാഗം കാർഡുകളും 8,427 (എൻ.പി.ഐ) കാർഡുകളും പുതുതായി അനുവദിച്ചിട്ടുണ്ട്.

നെടുമങ്ങാട് നഗരസഭ ചെയർപേഴ്‌സൺ ആർ.ജയദേവൻ അധ്യക്ഷനായി.

സിവിൽ സപ്ലൈസ് കമ്മിഷണർ കെ.എസ്.ഹിമ, കൗൺസിലർ ജെ.കൃഷ്‌ണകുമാർ, ജില്ലാ സപ്ലൈ ഓഫീസർ കെ.വി.സിന്ധു, നെടുമങ്ങാട് താലൂക്ക് സപ്ലൈ ഓഫീസർ സീമ, അസിസ്റ്റന്റ്' സപ്ലൈ ഓഫീസർ മധു തുടങ്ങിയവർ സംസാരിച്ചു.