കേന്ദ്രനീക്കത്തിനെതിരേ തൊഴിലുറപ്പ് തൊഴിലാളികളുടെ മാർച്ച്

പാലക്കാട്: കേന്ദ്രസർക്കാർ തൊഴിലുറപ്പ് പദ്ധതി അട്ടിമറിക്കുന്നുവെന്ന് ആരോപിച്ച് എൻആർഇജി വർക്കേഴ്സ് യൂണിയൻ ഹെഡ് പോസ്റ്റോഫീസിലേക്ക് മാർച്ച് നടത്തി. വിക്ടോറിയ കോളേജ് പരിസരത്തുനിന്നാണ് മാർച്ച് തുടങ്ങിയത്.

സിപിഎം ജില്ലാ സെക്രട്ടേറിയറ്റ് അംഗം വി. ചെന്താമരാക്ഷൻ ഉദ്ഘാടനം ചെയ്തുതു. തൊഴിലുറപ്പ് പദ്ധതിയുടെ പേരു മാറ്റി കേന്ദ്രസർക്കാർ തൊഴിലിലെ ഉറപ്പ് ഇല്ലാതാക്കുകയാണെന്ന് അദ്ദേഹം ആരോപിച്ചു. പുതിയ പദ്ധതി നടപ്പാക്കിയാൽ പഴയ പദ്ധതി പൂർണമായി അട്ടിമറിക്കപ്പെടും. സംസ്ഥാനസർക്കാരുകളെയും ജനങ്ങളെയും ബുദ്ധിമുട്ടിക്കാനാണ് കേന്ദ്രനീക്കമെന്നും ചെന്താമരാക്ഷൻ പറഞ്ഞു.

എൻആർഇജി വർക്കേഴ്‌സ് യൂണിയൻ ജില്ലാപ്രസിഡൻന്റ് പി. പ്രീത അധ്യക്ഷയായി. സംസ്ഥാന അധ്യക്ഷ ഗിരിജ സുരേന്ദ്രൻ, കർഷകസംഘം ജില്ലാസെക്രട്ടറി എം.ആർ. മുരളി, കെഎസ്കെടിയു ജില്ലാപ്രസിഡൻ്റ് ടി.എൻ. കണ്ടമുത്തൻ, സിഐടിയു ജില്ലാ ഖജാൻജി ടി.കെ. നൗഷാദ്, യൂണിയൻ ജില്ലാസെക്രട്ടറി കെ. വിജയൻ, ഖജാൻജി കെ. ശ്രീധരൻ എന്നിവർ സംസാരിച്ചു.