മികച്ച രജിസ്ട്രേഷൻ ഓഫീസിനുള്ള പുരസ്കാരം നീലേശ്വരം സബ് രജിസ്ട്രാർ ഓഫീസിന്

നീലേശ്വരം: രജിസ്ട്രേഷൻ ദിനത്തോടനുബന്ധിച്ച് ജില്ലയിലെ മികച്ച രജിസ്ട്രേഷൻ ഓഫീസിനുള്ള സംസ്ഥാന സർക്കാരിന്റെ പുരസ്കാരം നീലേശ്വരം സബ് രജിസ്ട്രാർ ഓഫീസിന്. 2024-25 വർഷത്തെ പ്രവർത്തനത്തിൻ്റെ അടിസ്ഥാനത്തിലാണ് അവാർഡുകൾ പ്രഖ്യാപിച്ചത്. രജിസ്ട്രേഷൻദിനമായ നാലിന് അഞ്ചരക്കണ്ടിയിൽവെച്ച് നടക്കുന്ന ചടങ്ങിൽ മുഖ്യമന്ത്രി പിണറായി വിജയൻ പുരസ്‌കാരം സമ്മാനിക്കും.

അണ്ടർ വാല്വേഷൻ നടപടികൾ നൂറുശതമാനം പൂർത്തീകരിച്ച ജില്ലയിലെ ഏക രജിസ്ട്രാർ ഓഫീസാണ് നീലേശ്വരം. ഇതിനുപുറമേ വേഗത്തിലുള്ള രജിസ്ട്രേഷൻ, രജിസ്ട്രേഷൻ കഴിഞ്ഞ ഉടൻതന്നെ കോപ്പികൾ നൽകുക, കൃത്യമായ ഫയൽ വർക്കുകൾ, ജനങ്ങളോടുള്ള പെരുമാറ്റവും സമീപനവും ഇതൊക്കെ പരിഗണിച്ചാണ് നീലേശ്വരം സബ് രജിസ്ട്രാർ ഓഫീസിനെ ജില്ലയിലെ മികച്ച ഓഫീസായി തിരഞ്ഞെടുത്തത്. വി.കെ. ബേബിയാണ് സബ് രജിസ്ട്രാർ. രജിസ്ട്രാർ ഉൾപ്പെടെ എട്ട് ജീവനക്കാരാണ് ഇവിടെയുള്ളത്.