ധോണിവേഴ്സ് ഫെസ്റ്റ് സമാപിച്ചു

പാലക്കാട് : ധോണിവേഴ്‌സ് ഫൗണ്ടേഷൻ നേതൃത്വത്തിൽ മൂന്ന് ദിവസങ്ങളിലായി ലീഡ് കോളേജിൽ നടന്നുവന്ന ധോണിവേഴ്സ‌സ് ഫെസ്റ്റ് സമാപിച്ചു. ലീഡ് കോളേജ് ഡയറക്ടർ തോമസ് ജോർജ് ഉദ്ഘാടനംചെയ്‌തു. അഡ്വ. മൃദുൽ കുഞ്ഞുമോൻ അധ്യക്ഷനായി. സാംസ്കാരികവേദിയായി ധോണിഗ്രാമത്തെ അവതരിപ്പിക്കുകയെന്ന ലക്ഷ്യത്തോടെയാണ് പരിപാടി സംഘടിപ്പിച്ചത്.

ആദ്യദിനംനടന്ന വടംവലി മത്സരത്തിൽ പാലക്കാട് 'വടക്കന്റെ കാട് വേലിക്കാട്' ടീം ഒന്നാംസ്ഥാനം നേടി. കേരള ടഗ് ഓഫ് വാർ വെൽഫെയർ അസോസിയേഷൻ ജില്ലാ പ്രസിഡന്റ് സെബി പന്തലാംപാടം, മലപ്പുറം ജില്ലാസെക്രട്ടറി മാനു കാരത്തോട്, ശിവകുമാർ തത്ത്വമസി എന്നിവർ നേതൃത്വം നൽകി.

രണ്ടാംദിനത്തിൽ നടന്ന ആണുങ്ങളുടെ കബഡി മത്സരത്തിൽ ചലഞ്ചേഴ്‌സ് കൊഴിഞ്ഞാമ്പാറ ടീമും സ്ത്രീകളുടെ കബഡി മത്സരത്തിൽ പഴനി തൃശ്ശൂർ ടീമും ഒന്നാം സ്ഥാനം നേടി. പ്രോ കബഡി ലീഗിൽനിന്നുള്ള ദേശീയതാരം ഷബീർ ബാബു നേതൃത്വം നൽകി. ഡോ. അജ്‌മലിന്റെ നേതൃത്വത്തിലുള്ള മെൻ്റലിസം ഷോ, കൈരളി കളരിയുടെ അഭ്യാസപ്രകടനം എന്നിവയും നടന്നു. അവസാനദിനം തെയ്യം, ഗരുഡപ്പറവ എന്നീ കലാരൂപങ്ങളുടെ അവതരണവുമുണ്ടായി. ഗാട്ടാഗുസ്തി മത്സരത്തിൽ ആൺ വിഭാഗത്തിൽ ആഷിഖും പെൺ വിഭാഗത്തിൽ മഞ്ജുഷയും ഒന്നാംസ്ഥാനം നേടി.