ഇരിങ്ങാലക്കുട റെയിൽവേ സ്റ്റേഷൻ വികസനം; കേന്ദ്രമന്ത്രിയുമായി ചർച്ച

ഇരിങ്ങാലക്കുട : ഇരിങ്ങാലക്കുട റെയിൽവേ സ്റ്റേഷൻ വികസനവുമായി ബന്ധപ്പെട്ട് കേന്ദ്ര റെയിൽവേ മന്ത്രി അശ്വിനി വൈഷ്‌ണവുമായി കേന്ദ്രമന്ത്രി സുരേഷ് ഗോപി ചർച്ച നടത്തി. സ്റ്റേഷനിലെ നിർമാണ പ്രവർത്തനങ്ങളുടെ നിലവിലെ ശോച്യാവസ്ഥയും യാത്രക്കാരുടെ ബുദ്ധിമുട്ടുകളും റെയിൽവേ മന്ത്രിയെ അറിയിച്ചു.

തൃശ്ശൂർ സ്റ്റേഷനിലെ തിരക്ക് കുറയ്ക്കാനും തൃപ്രയാർ ശ്രീരാമ ക്ഷേത്രത്തിലേക്കുള്ള ഭക്തർക്ക് സുഗമമായ യാത്ര ഉറപ്പാക്കാനും ഇരിങ്ങാലക്കുട സ്റ്റേഷൻ വികസിപ്പിക്കുന്നത് ഉപകരിക്കുമെന്നും ഇരിങ്ങാലക്കുട തിരൂർ പുതിയ ലൈൻ വേണമെന്നും മന്ത്രിയെ അറിയിച്ചു.

ഇരിങ്ങാലക്കുട - തിരൂർ പാത യാഥാർഥ്യമാക്കുന്നതിന് മന്ത്രിയുമായി ചർച്ച ചെയ്ത‌പ്പോൾ ഈ പദ്ധതിക്ക് റെയിൽവേ മന്ത്രാലയത്തിൻ്റെ അംഗീകാരമുണ്ടെങ്കിലും സംസ്ഥാന സർക്കാരിൻ്റെ ഭാഗത്തുനിന്ന് ആവശ്യമായ സഹകരണം ലഭിക്കുന്നില്ലെന്നായിരുന്നു മന്ത്രിയുടെ മറുപടി. ഇക്കാര്യത്തിൽ അടിയന്തര നടപടി സ്വീകരിക്കാൻ ആവശ്യപ്പെട്ട് മുഖ്യമന്ത്രിക്ക് കത്തയയ്ക്കാൻ അദ്ദേഹം ഉദ്യോഗസ്ഥരോട് നിർദേശിച്ചു.

ഗുരുവായൂരിനും തൃശ്ശൂരിനും ഇടയിൽ ഉച്ചയ്ക്ക് 12 മുതൽ രാത്രി 9.15 വരെ ട്രെയിനുകൾ ഇല്ലാത്ത സാഹചര്യം ശ്രദ്ധയിൽപ്പെടുത്തി ഈ റൂട്ടിൽ പുതിയ ട്രെയിൻ വേണമെന്ന് ആവശ്യപ്പെട്ടു. ഈ റൂട്ടിൽ തീർഥാടന-സാംസ്കാരിക ടൂറിസം പ്രോത്സാഹിപ്പിക്കുന്നതിനായി പുതിയ ട്രെയിൻ സർവീസ് ആരംഭിക്കാൻ റെയിൽവേ മന്ത്രി നിർദേശിച്ചതായും സുരേഷ് ഗോപി അറിയിച്ചു.