എസ്ഐആർ: ബംഗാളിൽ 58.2 ലക്ഷം വോട്ടർമാർ കുറഞ്ഞു

ന്യൂഡൽഹി: എസ്ഐആർ പ്രക്രിയയുടെ ഭാഗമായി പശ്ചിമബംഗാളടക്കം നാലുസംസ്ഥാനത്തും ലക്ഷദ്വീപിലും കരട് വോട്ടർപട്ടിക പ്രസിദ്ധീകരിച്ചു. ബംഗാളിൽ കരട് വോട്ടർപട്ടികയനുസരിച്ച് നേരത്തേയുണ്ടായിരുന്ന 7.66 കോടി വോട്ടർമാരിൽ 58.2 ലക്ഷം പേരാണ് ഒഴിവാക്കപ്പെട്ടത്. അഞ്ചിടത്തുമായി ആകെയുണ്ടായിരുന്ന 13.36 കോടി വോട്ടർമാരിൽ 12.32 കോടി പേർ കരട് പട്ടികയിൽ ഇടംനേടി. ഒരു കോടിയിലേറെ പേർ പുറത്തായി.

ബംഗാളിൽ 7.08 കോടി വോട്ടർമാരാണ് (92.40%) എന്യുമറേഷൻ ഫോം പൂരിപ്പിച്ചുനൽകിയത്. നിലവിലുണ്ടായിരുന്ന 7.66 കോടി വോട്ടർമാരിൽ 24.16 ലക്ഷം പേർ (3.15%) മരിച്ചതായി കണ്ടെത്തി. സ്ഥിരമായി സ്ഥലം മാറിപ്പോയവർ 32.65 ലക്ഷം പേരാണ് (4.26%). ഒന്നിലധികം സ്ഥലങ്ങളിൽ എൻറോൾ ചെയ്തതായി കണ്ടെത്തിയത് 1.38ലക്ഷം പേരാണ് (0.18%).

രാജസ്ഥാനിൽ കരടുവോട്ടർപട്ടിക പുറത്തുവന്നപ്പോൾ ഒഴിവാക്കപ്പെട്ടവരുടെ എണ്ണം 41.79 ലക്ഷമാണ്. ആകെയുള്ള 5.47 കോടി വോട്ടർമാരിൽ 8.75 ലക്ഷം പേർ മരിച്ചു.

പുതുച്ചേരിയിലുണ്ടായിരുന്ന 10,21,578 വോട്ടർമാരിൽ 1,03,467 പേരാണ് കരടുപട്ടിക വന്നപ്പോൾ ഒഴിവായത്. 20,798 പേർ മരിച്ചവരാണ്. ഒന്നിലധികം സ്ഥലങ്ങളിൽ വോട്ടർപട്ടികയിലുൾപ്പെട്ടവർ 2024ആണ്.

ലക്ഷദ്വീപിൽ ആകെയുള്ള 57813 പേരിൽ കരടുപട്ടികയിൽനിന്നൊഴിവായത് 1429 പേരാണ്. 705 പേർ മരിച്ചു. 252 പേർ സ്ഥിരമായി മാറിപ്പോയി. 472 പേർ ഒന്നിലധികം സ്ഥലങ്ങളിൽ വോട്ടർപട്ടികയിൽ ഉൾപ്പെട്ടിട്ടുണ്ട്.

ഗോവയിൽ ആകെയുള്ള 11.85 ലക്ഷം വോട്ടർമാരിൽ 1,00,042 പേരാണ് ഒഴിവാക്കിയത്. 25,574 പേർ മരിച്ചു. 1997 പേർ ഒന്നിലധികം സ്ഥലങ്ങളിൽ വോട്ടർപട്ടികയിൽ പേര് ഉൾപ്പെട്ടവരാണ്.