'പോറ്റിയെ... കേറ്റിയേ...' ഗാനത്തിന്റെ പേരിൽ ഡിജിപിക്ക് പരാതി

പന്തളം: അയ്യപ്പഭക്തിഗാനത്തെ രൂപംമാറ്റി ശരണംവിളിച്ചുള്ള "പോറ്റിയെ കേറ്റി......" എന്ന പാരഡിഗാനം ഇറക്കിയതിനെതിരേ ഡിജിപിക്ക് തിരുവാഭരണപാത സംരക്ഷണസമിതി പരാതി നൽകി. അയ്യപ്പഭക്തരുടെ മനസ്സിനെ വേദനിപ്പിക്കുന്നതാണെന്നും നടപടിയെടുക്കണമെന്നും ജനറൽ സെക്രട്ടറി പ്രസാദ് കുഴികാല ആവശ്യപ്പെട്ടു. യുഡിഎഫും ബിജെപിയും ഒരുപോലെ ഈ പാട്ട് പ്രചാരണത്തിനുപയോഗിച്ചിരുന്നു.

ഭക്തിഗാനങ്ങളെ അനുകരിച്ച് പാരഡിഗാനങ്ങൾ വേണ്ടാ -രാജു ഏബ്രഹാം

ഏത് മതത്തിന്റേതായാലും ഭക്തിഗാനങ്ങളെ അനുകരിച്ച് പാരഡിഗാനങ്ങൾ വേണ്ടെന്നും ഇത് അംഗീകരിക്കാൻപറ്റില്ലെന്നും സിപിഎം ജില്ലാ സെക്രട്ടറി രാജു ഏബ്രഹാം. പാരഡിയിലൂടെ ശരണമന്ത്രത്തെ ദുരുപയോഗപ്പെടുത്തുന്നത് ദുഃഖത്തോടെ കണ്ടുകൊണ്ടിരിക്കുകയാണ്. തിരുവാഭരണപാത സംരക്ഷണസമിതി നൽകിയ പരാതി ഗൗരവത്തിൽ അന്വേഷിക്കണമെന്നും രാജു ഏബ്രഹാം ആവശ്യപ്പെട്ടു.