ആസൂത്രകർ പകൽവെളിച്ചത്തിലുള്ളത് ഭയപ്പെടുത്തുന്നു -മഞ്ജു വാരിയർ

കൊച്ചി: നടി ആക്രമിക്കപ്പെട്ട കേസിൽ നീതി പൂർണമായി നടപ്പാക്കിയെന്ന് പറയാനാകില്ലെന്ന് നടി മഞ്ജു വാരിയർ. ഇത് ആസൂത്രണംചെയ്‌തവർ ആരായാലും അവർ പുറത്ത് പകൽവെളിച്ചത്തിലുണ്ടെന്നത് ഭയപ്പെടുത്തുന്ന യാഥാർഥ്യമാണെന്നും മഞ്ജു സാമൂഹികമാധ്യമത്തിൽ കുറിച്ചു.

ആസൂത്രണം ചെയ്‌തവർകൂടി ശിക്ഷിക്കപ്പെട്ടാലേ അതിജീവിതയ്ക്കുള്ള നീതി പൂർണമാകുകയുള്ളൂ. പോലീസിലും നിയമസംവിധാനത്തിലും താനുൾപ്പെടെയുള്ള സമൂഹത്തിനുള്ള വിശ്വാസം ദൃഢമാകാൻ അതുകൂടി കണ്ടെത്തിയേ തീരു.

ഈ പോരാട്ടം അവൾക്കുവേണ്ടി മാത്രമല്ല, ഈ നാട്ടിലെ ഓരോ പെൺകുട്ടിക്കും ഓരോ സ്ത്രീക്കും ഓരോ മനുഷ്യർക്കുംകൂടി വേണ്ടിയാണ്. അവർക്ക് തൊഴിലിടങ്ങളിലും തെരുവിലും ജീവിതത്തിലും സധൈര്യം തലയുയർത്തിപ്പിടിച്ച് ഭയപ്പാടില്ലാതെ നടക്കാൻ കഴിയുന്ന സാഹചര്യമുണ്ടാകണം. അത് ഉണ്ടായേ തീരു. അന്നും ഇന്നും എന്നും അവൾക്കൊപ്പമെന്നും കുറിപ്പിൽ പറയുന്നു.