രാഷ്ട്രീയജീവിതം അവസാനിപ്പിക്കുന്നുവെന്ന് ഇ.എം. ആഗസ്തി

കട്ടപ്പന: സജീവരാഷ്ട്രീയം അവസാനിപ്പിക്കുന്നുവെന്ന് മുൻ എംഎൽഎയും എഐസിസി അംഗവുമായ ഇ.എം. ആഗസ്തി. തദ്ദേശതിരഞ്ഞെടുപ്പിൽ നേരിട്ട പരാജയത്തിന് പിന്നാലെയാണ് സാമൂഹികമാധ്യമത്തിലൂടെ ഇക്കാര്യം അറിയിച്ചത്.

കട്ടപ്പന നഗരസഭയിലെ 22-ാം വാർഡായ ഇരുപതേക്കറിൽ, എൽഡിഎഫ് സ്ഥാനാർഥി സി.ആർ. മുരളിയോട് 59 വോട്ടിനാണ് പരാജയപ്പെട്ടത്. സി.ആർ. മുരളി 303 വോട്ട് നേടി. ഇ.എം. ആഗസ്‌തിക്ക് 244 വോട്ടുകളേ കിട്ടിയുള്ളൂ.

മുൻപ് ഉടുമ്പൻചോല നിയമസഭാമണ്ഡലത്തിൽ എം.എം. മണിയോട് പരാജയപ്പെട്ടപ്പോൾ ആഗസ്‌തി തലമൊട്ടയടിച്ചിരുന്നു. ശനിയാഴ്ച നഗരസഭാ തിരഞ്ഞെടുപ്പ് കഴിഞ്ഞ് പുറത്തുവന്ന ആഗസ്‌തിയെ ഇത്തവണ എൽഡിഎഫ് പ്രവർത്തകരും യുഡിഎഫിലെ ചില പ്രവർത്തകരും കൂകിവിളിക്കുകയുണ്ടായി. ഇതോടെയാണ് അരനൂറ്റാണ്ട് പിന്നിട്ട തൻ്റെ രാഷ്ട്രീയജീവിതം അവസാനിപ്പിക്കുന്നതായി ആഗസ്‌തി പ്രഖ്യാപിച്ചത്.