ചലച്ചിത്രപ്രവർത്തകയോട് മോശമായി പെരുമാറിയെന്ന് പി.ടി. കുഞ്ഞുമുഹമ്മദിനെതിരേ കേസ്

തിരുവനന്തപുരം: മോശമായി പെരുമാറിയെന്ന ചലച്ചിത്ര പ്രവർത്തകയുടെ പരാതിയിൽ സംവിധായകനും മുൻ ഇടതുസ്വതന്ത്ര എംഎൽഎയുമായ പി.ടി. കുഞ്ഞുമുഹമ്മദിൻ്റെപേരിൽ കേസ്. ഐഎഫ്എഫ്‌കെ ചലച്ചിത്ര സ്ക്രീനിങ്ങിനിടെ അപമാനിച്ചെന്ന് മുഖ്യമന്ത്രിക്കുനൽകിയ പരാതി കന്റോൺമെന്റ് പോലീസിന് കൈമാറിയിരുന്നു. മലയാള സിനിമകൾ തിരഞ്ഞെതടുക്കുന്നതിനുള്ള ജൂറി ചെയർമാനാണ് അദ്ദേഹം.

ഏതാനും ആഴ്ചകൾക്കുമുൻപ് തലസ്ഥാനത്തെ ഹോട്ടൽ മുറിയിൽവെച്ച് കടന്നുപിടിച്ചതായാണ് പരാതി. ഹോട്ടലിൽനിന്ന് സിസിടിവി ദൃശ്യങ്ങൾ ഉൾപ്പെടെ പോലീസ് ശേഖരിക്കുകയും പ്രാഥമിക പരിശോധന നടത്തുകയും ചെയ്‌തിരുന്നു. ജാമ്യമില്ലാ വകുപ്പുപ്രകാരമാണ് കേസ്.