പോലീസ് വീട്ടുകാരോട് മോശമായി പെരുമാറിയെന്ന്; രാഹുൽ മാങ്കൂട്ടത്തിലിന്റെ്റെ സുഹൃത്തിൻ്റെ നേതൃത്വത്തിൽ പോലീസ് സ്റ്റേഷൻ ഉപരോധം

അടൂർ: രാഹുൽ മാങ്കൂട്ടത്തിൽ എംഎൽഎയെ തിരക്കി സുഹൃത്തും യൂത്ത് കോൺഗ്രസ് സംസ്ഥാന സെക്രട്ടറിയുമായ ഫെന്നി നൈനാൻ്റെ വീട്ടിലെത്തിയ പോലീസ് വീട്ടുകാരോട് മോശമായി പെരുമാറി എന്നാരോപിച്ച് ഫെന്നിനൈനാന്റെ നേതൃത്വത്തിൽ യൂത്ത് കോൺഗ്രസ്, കെഎസ്‌യു പ്രവർത്തകർ അടൂർ പോലീസ് സ്റ്റേഷൻ ഉപരോധിച്ചു. ഞായറാഴ്‌ച വൈകീട്ട് ആറിനാണ് ഫെന്നി നൈനാന്റെ അടൂർ നെല്ലിമൂട്ടിൽപ്പടിയിലുള്ള വീട്ടിൽ പോലീസ് എത്തിയത്. ഈ സമയം ഫെന്നി നൈനാൻ വീട്ടിൽ ഉണ്ടായിരുന്നില്ല. അടൂർ നഗരസഭ എട്ടാംവാർഡിൽ കോൺഗ്രസ് സ്ഥാനാർഥിയായി മത്സരിക്കുന്നതിനാൽ പോത്രാട് ഭാഗത്ത് പ്രചാരണത്തിലായിരുന്നു ഫെന്നി. വീട്ടിലെത്തിയ പോലീസ് അമ്മയോട് മോശമായി പെരുമാറിയെന്നാണ് ഫെന്നിയുടെ ആരോപണം.