ഉയർന്ന പെൻഷൻ: പ്രോ റേറ്റ നടപ്പാക്കിയത് കേന്ദ്രനിർദേശം അട്ടിമറിച്ച്

ന്യൂഡൽഹി: സുപ്രീംകോടതി വിധിച്ച ഉയർന്ന പിഎഫ് പെൻഷൻ അട്ടിമറിക്കാൻ കേന്ദ്രസർക്കാരിൻ്റെ നിർദേശംവരെ ഇപിഎഫ്‌ഒ അവഗണിച്ചതായി തെളിയുന്നു. തൊഴിൽമന്ത്രാലയത്തിലെ അണ്ടർ സെക്രട്ടറി 2023 മേയ് 31-ന് കേന്ദ്ര പ്രോവിഡന്റ് ഫണ്ട് കമ്മിഷണർക്ക് എഴുതിയ കത്തിലാണ് ഇക്കാര്യങ്ങൾ വ്യക്തമാകുന്നത്. ഉയർന്ന പെൻഷനുവേണ്ടി അധിക ശമ്പളവിഹിതം പിടിക്കുന്നതിന് ഇപിഎഫ്‌ഒ സ്വയം പ്രശ്‌നങ്ങൾ സൃഷ്‌ടിച്ചതാണെന്ന് കത്തിൽ കുറ്റപ്പെടുത്തുന്നു. മാത്രവുമല്ല, വിരമിക്കുന്നതിൻ്റെ തൊട്ടുമുൻപുള്ള 60 മാസത്തെ ശമ്പളത്തിൻ്റെ ശരാശരിയെ അടിസ്ഥാനമാക്കി വേണം പെൻഷൻ കണക്കാക്കാനെന്ന് തൊഴിൽമന്ത്രി നിർദേശിച്ചതായും കത്തിലുണ്ട്.

ഈ കത്തയച്ചതിൻ്റെ പിറ്റേന്നുതന്നെ ഇക്കാര്യങ്ങൾ അംഗീകരിച്ചുകൊണ്ട് ഇപിഎഫ്ഒയുടെ സർക്കുലറും ഇറങ്ങി. 2014 സെപ്റ്റംബർ ഒന്നിനുശേഷം പെൻഷൻ നൽകിത്തുടങ്ങുന്നവർക്ക് അവസാനത്തെ അറുപതുമാസത്തെ ശമ്പളത്തിന്റെ ശരാശരിതന്നെയായിരിക്കും അടിസ്ഥാനമാക്കുകയെന്ന് 2023 ജൂൺ ഒന്നിന് ഇറക്കിയ സർക്കുലറിൽ പറയുന്നു. അതിനുമുൻപ് പെൻഷൻ ആരംഭിക്കുന്നവർക്ക് അവസാനത്തെ 12 മാസത്തിൻ്റെ ശരാശരിയാകും അടിസ്ഥാനമാക്കുക.

എന്നാൽ, പിന്നീടാണ് യഥാർഥ ശമ്പളത്തെ അടിസ്ഥാനമാക്കിയുള്ള ഉയർന്ന പെൻഷനെ അട്ടിമറിക്കാൻ പ്രോ റേറ്റ രീതി ഇപിഎഫ്ഒ (എംപ്ലോയീസ് പ്രോവിഡൻഡ് ഫണ്ട് ഓർഗനൈസേഷൻ) അവലംബിച്ചത്. ഇക്കാര്യം വ്യക്തമാക്കി ഈ വർഷം ജനുവരി 18-ന് ഇപിഎഫ്‌ഒ സർക്കുലറും ഇറക്കി.

അവസാനത്തെ 60 മാസത്തെ ശമ്പളത്തിൻ്റെ ശരാശരിയെടുത്ത് പെൻഷൻ കണക്കാക്കുന്നതിന് പകരം 2014 സെപ്റ്റംബർ ഒന്നിനുമുൻപും ശേഷവുമുള്ള സർവീസുകളെ രണ്ടായി പരിഗണിക്കുന്ന പ്രോ റേറ്റാ രീതി അവലംബിച്ചതോടെ പെൻഷൻ ഗണ്യമായി കുറഞ്ഞു. കാരണം, 2014-ലെ ശമ്പളത്തെ അടിസ്ഥാനമാക്കിയാണ് അതിനുമുൻപുള്ള സേവനകാലയളവിലെ പെൻഷൻ കണക്കാക്കുന്നത്. യഥാർഥ ശമ്പളത്തിന് കണക്കാക്കിത്തന്നെ പെൻഷൻഫണ്ടിലേക്ക് വിഹിതം അടച്ച് ഉയർന്ന പെൻഷനായി കാത്തിരുന്നവർക്കാണ് ഇപിഎഫ്‌ഒയുടെ ഇരുട്ടടി നേരിട്ടത്.

സുപ്രീംകോടതി വിധിയുടെ അന്തഃസത്ത ഇപിഎഫ്‌ഒ അട്ടിമറിച്ചു.

2022 നവംബർ നാലിനാണ് പിഎഫ് അംഗങ്ങൾക്ക് ഉയർന്ന പെൻഷൻ നൽകാൻ സുപ്രീംകോടതി വിധിച്ചത്, അതിനുശേഷം 2023 മേയ് വരെ ലഭിച്ച 15.9 ലക്ഷം അപേക്ഷകളിൽ ഒന്നുപോലും ഇപിഎഫ്‌ഒ യോഗ്യതയുള്ളതായി കണക്കാക്കാത്തതിന് കാരണം അവർതന്നെ സൃഷ്‌ടിച്ച പ്രശ്‌നങ്ങളാണെന്നും തൊഴിൽമന്ത്രാലയത്തിൻ്റെ കത്തിൽ കുറ്റപ്പെടുത്തുന്നു. ഉയർന്ന ശമ്പളവിഹിതം നൽകാൻ ജോയിൻ്റ് ഓപ്ഷൻ നൽകുന്നതിലെ പ്രശ്ന‌ം പിന്നീട് പരിഹരിക്കപ്പെട്ടെങ്കിലും പെൻഷൻ വെട്ടിക്കുറയ്ക്കാൻ പ്രോറേറ്റ കൊണ്ടുവന്നത് വഴി കേന്ദ്രനിർദേശവും സുപ്രീംകോടതി വിധിയുടെ അന്തഃസത്തയുമാണ് ഇപിഎഫ്ഒ അട്ടിമറിച്ചത്.