രാഹുലിന്റെ മുൻകൂർ ജാമ്യാപേക്ഷ ബുധനാഴ്‌ച പരിഗണിക്കും

തിരുവനന്തപുരം: ലൈംഗികാതിക്രമപരാതി നേരിടുന്ന രാഹുൽ മാങ്കുട്ടത്തിൽ എംഎൽഎ നൽകിയ മുൻകൂർ ജാമ്യഹർജി പ്രിൻസിപ്പൽ ജില്ലാസെഷൻസ് കോടതി ബുധനാഴ്‌ച പരിഗണിക്കും. അറസ്റ്റ് ചെയ്യുന്നതിന് കോടതി ഒരു തടസ്സവും ഇതുവരെ ഉന്നയിച്ചിട്ടില്ല. പോലീസ് തിരയുന്നതിനിടയിലും രാഹുൽ വെള്ളിയാഴ്ച്‌ച തിരുവനന്തപുരത്തെ അഭിഭാഷകൻ്റെ ഓഫീസിൽ നേരിട്ടെത്തിയാണ് ജാമ്യഹർജിയിൽ ഒപ്പിട്ടതെന്നാണ് വിവരം.

ഹർജിയിൽ രാഹുൽ ഉന്നയിച്ച കാര്യങ്ങളെല്ലാം തള്ളുന്ന മൊഴിയാണ് പരാതിക്കാരിയായ യുവതി അന്വേഷണസംഘത്തിന് നൽകിയത്. യുവതി വിവാഹിതയാണെന്നും ഗർഭിണിയായതിൻ്റെ ഉത്തരവാദി താനല്ലെന്നുമാണ് മാഹുൽ പറഞ്ഞത്. 2024 ഓഗസ്റ്റ് 22-നായിരുന്നു വിവാഹമെന്നും ഭർത്താവുമൊത്ത് കഴിഞ്ഞത് നാലുദിവസം മാത്രമാണെന്നുമാണ് യുവതിയുടെ മൊഴി. ഒരുമാസമായപ്പോഴേക്കും വിവാഹബന്ധം ഒഴിഞ്ഞു. പിന്നീട് അഞ്ചുമാസത്തിനുശേഷമാണ് രാഹുലിനെ പരിചയപ്പെടുന്നതെന്ന് യുവതി മൊഴിനൽകിയതായാണ് വിവരം.

കേസിൽ തന്റെ വാദം തെളിയിക്കുന്നതിനുള്ള ഡിജിറ്റൽ തെളിവുകളും രാഹുലിന്റെ ഹർജിക്കൊപ്പം കോടതിയിൽ നൽകിയിട്ടുണ്ട്. യുവതി വിവാഹിതയാണെന്ന് അറിയാമായിരുന്നുവെന്നും ഭർത്താവിന്റെ ഉപദ്രവം വിവരിച്ചാണ് സംസാരിച്ചതെന്നുമാണ് രാഹുൽ വിശദീകരിക്കുന്നത്. വ്യക്തിബന്ധമാണ് വളർന്ന് ശാരീരിക അടുപ്പത്തിലേക്ക് എത്തിയതെന്നും അദ്ദേഹം പറയുന്നു.

വെള്ളിയാഴ്ചയാണ് രാഹുൽ ഹർജി നൽകിയത്, രാഹുലിനെ അറസ്റ്റ് ചെയ്യാനുള്ള ശ്രമത്തിലാണ് അന്വേഷണസംഘം. ഫോൺ സ്വിച്ച് ഓഫാണ്. എവിടെയാണെന്നതിനെക്കുറിച്ചും വിവരമില്ല.