വിദ്യാർഥികളുടെ നവചിന്തകളാൽ തിളങ്ങി റെയർ ജെംസ് ജില്ലാമത്സരം

തൊടുപുഴ റെയർ എർത്ത് മൂലകങ്ങളുടെ ഭാവി ശാസ്ത്ര-സാങ്കേതിക ഉപയോഗങ്ങളെക്കുറിച്ചുള്ള വിദ്യാർഥികളുടെ പുതുമയാർന്ന ചിന്തകൾ അവതരണങ്ങളിൽ വിരിഞ്ഞപ്പോൾ, അത് വിജ്ഞാനോത്സവമായി. മാതൃഭൂമി വിദ്യയും ഐആർഇഎൽ (ഇന്ത്യ) ലിമിറ്റഡും ചേർന്ന് സംഘടിപ്പിച്ച ജില്ലാതല റെയർ ജെംസ് മത്സരം ഭാവിയിലെ ശാസ്ത്രപ്രതിഭകളെ കണ്ടെത്താനുള്ള വേദിയായി.

റെയർ എർത്ത് മൂലകങ്ങളുടെ പ്രാധാന്യവും ഭാവി സാധ്യതകളും പ്രോജക്ട് റിപ്പോർട്ടായി അവതരിപ്പിക്കുന്നതായിരുന്നു മത്സരം കട്ടപ്പന- തൊടുപുഴ വിദ്യാഭ്യാസ ജില്ലകളിലെ മത്സരത്തിൽ ആദ്യ മൂന്ന് സ്ഥാനങ്ങൾ നേടിയ ആറ് കുട്ടികൾ ആണ് ജില്ലാതല മത്സരത്തിൽ പങ്കെടുത്തത്.

മത്സരത്തിൽ ഒന്നാംസ്ഥാനം എസ്. അനന്തലക്ഷ്‌മി (മന്നം മെമ്മോറിയൽ ഹൈസ്കൂൾ, നരിയമ്പാറ), രണ്ടാംസ്ഥാനം കുഞ്ചാക്കോ എ. വട്ടക്കുന്നേൽ (വിമല പബ്ലിക് സ്‌കൂൾ, തൊടുപുഴ), മൂന്നാംസ്ഥാനം കൃഷ്ണ ബാബു(എംകെഎൻഎം എച്ച്എസ്എസ്, കുമാരമംഗലം) എന്നിവർ കരസ്ഥമാക്കി.

തൊടുപുഴ ന്യൂമാൻ കോളേജിലെ കെമിസ്ട്രി വിഭാഗം അസിസ്റ്റന്റ് പ്രൊഫസർമാരായ ഡോ. അലക്സ് ജോസഫ്, ഡോ. അനു മേരി ജോസഫ് എന്നിവരായിരുന്നു വിധികർത്താക്കൾ. മാതൃഭൂമി ഡെപ്യൂട്ടി ചീഫ് മാനേജർ സർക്കുലേഷൻ സജി കെ.തോമസ്, സർക്കുലേഷൻ മാനേജർ ജിബി ജോസഫ് എന്നിവർ സംസാരിച്ചു.