തിരഞ്ഞെടുപ്പ് പ്രചാരണം :സ്വകാട് പരിശോധന തുടങ്ങി

കുളത്തുപ്പുഴ: തദ്ദേശതിരഞ്ഞെടുപ്പുമായി ബന്ധപ്പെട്ട പ്രചാരണപ്രവർത്തനങ്ങൾ വിലയിരുത്തി നിയമവിരുദ്ധ പ്രവർത്തനങ്ങൾക്കെതിരേ നടപടി സ്വീകരിക്കാൻ താലൂക്കുതലത്തിൽ ആൻറി ഡീഫേസ്മെൻറ് സ്‌ക്വാഡുകൾ പ്രവർത്തനമാരംഭിച്ചു.

തിരഞ്ഞെടുപ്പിൽ സ്ഥാനാർഥികളും വിവിധ രാഷ്ട്രീയകക്ഷികളും നടത്തുന്ന പ്രചാരണപരിപാടികൾ പരിശോധിക്കുന്നതിനൊപ്പം നോട്ടീസ്, ബാനർ, ബോർഡ്, പോസ്റ്ററുകൾ, ചുവരെഴുത്ത്, ഉച്ചഭാഷിണി, പൊതുയോഗങ്ങൾ, നവമാധ്യമങ്ങളിലൂടെയുള്ള പ്രചാരണപരിപാടികളുടെ നിയമസാധ്യതകൾ എന്നിവ സ്ക്വാഡുകൾ പരിശോധിച്ച് നടപടി സ്വീകരിക്കും. ലഘുലേഖ പ്രസിദ്ധീകരണം, കമാനങ്ങൾ സ്ഥാപിക്കൽ എന്നിവയുമായി ബന്ധപ്പെട്ട മാർഗനിർദേശങ്ങളും ഹരിത മാനദണ്ഡങ്ങളും സ്‌ക്വാഡ് ഉറപ്പുവരുത്തി. അനധികൃതവും നിയമപരവുമല്ലാത്ത പ്രചാരണസാമഗ്രികൾ സ്ക്വാഡ് നീക്കംചെയ്തുതുടങ്ങി.

തദ്ദേശതിരഞ്ഞെടുപ്പിൽ പ്രചാരണവുമായി ബന്ധപ്പെട്ട് പൊതുജനങ്ങളുടെ 135 പരാതികളാണ് പുനലൂർ താലൂക്കിൽ ലഭിച്ചത്. ഇവയെല്ലാം സംഘം പരിശോധിച്ച് പരിഹരിച്ചിട്ടുണ്ട്. തുടക്കത്തിൽ ഒന്നാംഘട്ടമായി ബോധവത്കരണ പ്രവർത്തനങ്ങളാണ് നടക്കുന്നതെന്ന് സംഘം തലവൻ പുനലൂർ താലൂക്ക് ഡെപ്യൂട്ടി തഹസിൽദാർ പി. ജയദേവൻ അറിയച്ചു.

പൊതുനിരത്തിൽ സ്ഥാപിച്ചിരുന്ന പ്രചാരണബോർഡുകൾ അതത് രാഷ്ട്രീയപാർട്ടികളെക്കൊണ്ട് നീക്കംചെയ്താണ് പരാതി പരിഹരിച്ചത്. ആവർത്തിച്ചാൽ 5,000 രൂപവരെ പിഴ ചുമത്തുമെന്നും സംഘം അറിയിച്ചു.

എസ്.എൽ. ലാലു, വി.ജി. ശ്രീകുമാർ, വിഷ്‌ണു, പി. ശ്രീകുമാർ എന്നിവരുടെ നേതൃത്വത്തിലുള്ള സംഘമാണ് പരിശോധന നടത്തിയത്.