ചരിത്രനിർമിതിയിൽ ബദൽ ആധുനികത അനിവാര്യമെന്ന് ചരിത്ര കോൺഗ്രസ്

തിരുവനന്തപുരം: ജാതിവിഷയങ്ങളെയും പുറത്താക്കപ്പെട്ടവരുടെ പോരാട്ടങ്ങളെയും കേന്ദ്രീകരിച്ച് ചരിത്രത്തിൽ ബദൽ ആധുനികത സൃഷ്ടിക്കേണ്ടതുണ്ടെന്ന് ചരിത്ര കോൺഗ്രസ്.

ഇന്ത്യൻ ചരിത്രത്തെക്കുറിച്ചുള്ള 'തെക്കൻ' ധാരണയും പ്രബലമായ ഉത്തരേന്ത്യൻ ആഖ്യാനവും തമ്മിലുള്ള വ്യത്യാസം രേഖപ്പെടുത്തി, കേരളത്തിന്റെ ഒരു 'ആഗോള ചരിത്രം' സൃഷ്‌ടിക്കപ്പെടേണ്ടതുണ്ടെന്നും പത്താം വാർഷികസമ്മേളനം ആഹ്വാനംചെയ്തു.

രാജകുടുംബത്തോട് അമിതമായ ആരേവുപ്രകടിപ്പിച്ച മുൻഗാമികളിൽനിന്ന് വ്യത്യസ്തമായി, പക്ഷപാതമില്ലാത്ത ചരിത്രരചനയ്ക്ക് മുൻഗണന നൽകിയ ഗ്രന്ഥകാരനാണ് എ. ശ്രീധരമേനോനെന്ന് അനുസ്‌മരണപ്രഭാഷണത്തിൽ ഇഫ്ളു കമ്യൂണിക്കേഷൻ വിഭാഗം പ്രൊഫസർ ഡോ. ടി.ടി. (ശ്രീകുമാർ പറഞ്ഞു.

സി.പി. രാമസ്വാമി അയ്യരുടെയും രാജകുടുംബത്തിൻ്യും സ്വേച്ഛാധിപത്യത്തെയും പുന്നപ്ര-വയലാർ പോലുള്ള അടിച്ചമർത്തലുകളിലെ അവരുടെ പങ്കാളിത്തത്തെയും അദ്ദേഹത്തിൻ്റെ രചനകൾ ധൈര്യപൂർവം തുറന്നുകാട്ടിയെന്നും അദ്ദേഹം പറഞ്ഞു. 'സിനിമ, ചരിത്രം, സമൂഹം' എന്ന ചർച്ചയിൽ മധുപാൽ, ഡോ. സെബാസ്റ്റ്യൻ ജോസഫ്, എസ്.ആർ. പ്രവീൺ, ഡോ. രാധിക ലാൽ എന്നിവർ പങ്കെടുത്തു.

ഭാവനയിലധിഷ്ഠിതമായ സിനിമാരംഗത്ത് ചരിത്രപഠനത്തിനായി സിനിമയെ സമീപിക്കുന്ന രീതിശാസ്ത്രം ഉപയോഗപ്പെടുത്തേണ്ടതുണ്ടെന്ന് നിർദേശമുയർന്നു.

'കേരളചരിത്രലേഖനം എംജിഎസും ശേഷവും' എന്ന പാനൽ ചർച്ചയിൽ ഡോ. പി.പി. അബ്ദുൽ റസാഖ് മോഡറേറ്ററായി. പ്രൊഫ. കെ.എൻ. ഗണേഷ്, ഡോ. ശിബി എന്നിവരും പങ്കെടുത്തു.

അമർനാഥ് രാമകൃഷ്‌ണൻ്റെ പ്രഭാഷണം ഇന്ന്

തമിഴ്‌നാട്ടിലെ വൈഗാ നദീതടത്തിലെ കീഴടിയിലെ ഉത്ഖനനത്തിന് നേതൃത്വം നൽകിയ ഡോ. അമർനാഥ് രാമകൃഷ്‌ണൻ ശനിയാഴ്‌ച 10-ന് പ്രഭാഷണം നടത്തും.

വെങ്കലയുഗ നാഗരികതയായിരുന്നു കീഴടിയിലേതെന്ന കണ്ടെത്തൽ വിവാദമായിരുന്നു. വിമെൻസ് കോളേജ് അസംബ്ലി ഹാളിലാണ് പ്രഭാഷണം.