സുഗന്ധവ്യഞ്ജനങ്ങൾക്ക് മാർക്കറ്റും കംപ്ലയൻസ് ഹബ്ബുകളും സ്ഥാപിക്കണം

കൊച്ചി: ഇന്ത്യയിലെ പ്രമുഖ മെട്രോ നഗരങ്ങൾ കേന്ദ്രീകരിച്ച് സുഗന്ധവ്യഞ്ജനങ്ങൾക്കു മാത്രമായി മാർക്കറ്റും കംപ്ലയൻസ് ഹബ്ബുകളും സ്ഥാപിക്കണമെന്ന് കേന്ദ്രത്തോട് ആവശ്യപ്പെട്ട് സ്പൈസസ് ബോർഡ് ചെയർപേഴ്സൺ അഡ്വ. സംഗീത വിശ്വനാഥൻ. കേന്ദ്ര വാണിജ്യമന്ത്രി പിമ്പുഷ് ഗോയലുമായി ഡൽഹിയിൽ നടത്തിയ ചർച്ചയിലാണ് ആവശ്യമുന്നയിച്ചത്.

സുഗന്ധവ്യഞ്ജനങ്ങളുടെ ഗുണനിലവാര പരിശോധന, ഡോക്യുമെൻറേഷൻ, ബാങ്കിങ് പിന്തുണ, ഡിജിറ്റൽ ഫയലിങ്ങുകൾ എന്നിവ കാര്യക്ഷമമാക്കാൻ കംപ്ലയൻസ് ഹബ്ബുകളിലൂടെ സാധിക്കും. സുഗന്ധവ്യഞ്ജനങ്ങളുടെ ഗുണനിലവാരം ഉറപ്പാക്കുന്നതിന് പ്രധാന ഉത്പാദന കേന്ദ്രങ്ങളിൽ അക്രെഡിറ്റഡ് ലാബ് സൗകര്യം ഏർപ്പെടുത്തുന്നതിനെക്കുറിച്ചും ഇന്ത്യയിൽനിന്ന് അമേരിക്കയിലേക്കുള്ള ഒലിയോറെസിൻ പാപ്രിക്ക കയറ്റുമതിയിലെ ഇറക്കുമതി നിയന്ത്രണ തീരുവ (ആൻ്റി ഡംപിങ് ഡ്യൂട്ടി), എതിർ തീരുവ (കൗണ്ടർവെയിലിങ് ഡ്യൂട്ടി) എന്നിവയെക്കുറിച്ചും ചർച്ചചെയ്‌തതായി അഡ്വ. സംഗീത വിശ്വനാഥൻ പറഞ്ഞു.