നാലുപതിറ്റാണ്ട് മുൻപേ തുടങ്ങിയെന്ന് പഠനം

കാസർകോട്: ജലാശയങ്ങളിൽ മൈക്രോപ്ലാസ്റ്റിക്കുകൾ അടിയുന്നത്

പ്രകൃതിക്കും ജീവജാലങ്ങൾക്കുമുണ്ടാക്കുന്ന ഭീഷണി 40 വർഷം മുൻപേ തുടങ്ങിയെന്ന് കണ്ടെത്തി ശാസ്ത്രസംഘം. കർണാടക ചിക്‌മംഗളൂരുവിലെ ഉൾനാടൻ ഗ്രാമമായ സക്രെപട്ടണത്തെ മദഗദകരെ തടാകത്തിലാണ് 1970 മുതൽ സൂക്ഷ്‌മപ്ലാസ്റ്റിക് കണങ്ങൾ അടിഞ്ഞുകൂടിത്തുടങ്ങിയതായി കണ്ടെത്തിയത്. പഠനം ജേണൽ ഓഫ് സെഡിമെൻ്ററി എൻവയോൺമെന്റിൽ പ്രസിദ്ധീകരിച്ചു.

കേരള കേന്ദ്രസർവകലാശാലയിലെ ജിയോളജി വിഭാഗമാണ് പഠനം നടത്തിയത്. രാജ്യത്ത് തടാകത്തിൽനിന്ന് ശേഖരിച്ച അവശിഷ്‌ടങ്ങളിൽ വർഷംതോറുമുള്ള മൈക്രോപ്ലാസ്റ്റിക് മാറ്റങ്ങൾ രേഖപ്പെടുത്തിയ ആദ്യ പഠനമാണിത്. 1970-കളുടെ മധ്യത്തിൽ ആരംഭിച്ച പ്ലാസ്റ്റിക് മലിനീകരണത്തിൻ്റെ വളർച്ചയെക്കുറിച്ച് ഇതിലൂടെ തെളിവുകൾ ലഭിക്കുന്നു. ഏകദേശം 43 വർഷം അടിഞ്ഞുകൂടിയ പ്ലാസ്റ്റിക് അവശിഷ്ട്‌ടങ്ങൾ വിശകലനം ചെയ്‌തപ്പോൾ. 1975-ലാണ് ആദ്യ മൈക്രോപ്ലാസ്റ്റിക് കണങ്ങൾ പ്രത്യക്ഷപ്പെട്ടതെന്ന് ഗവേഷകർ കണ്ടെത്തി. തുടർന്ന് 2010 വരെ മൈക്രോപ്ലാസ്റ്റിക് അളവിൽ സ്ഥിരമായ വർധന രേഖപ്പെടുത്തി. 2010-16 കാലഘട്ടത്തിൽ വർധനയിൽ ചെറിയ കുറവുണ്ട്.

ഉൾനാടൻ തടാകത്തിലെ മൈക്രോപ്ലാസ്റ്റിക് സാന്നിധ്യം ഞെട്ടിക്കുന്നതാണെന്നും മേൽപ്പാളിയിലെ ഇതിൻ്റെ അളവ് ആശങ്കാജനകമാണെന്നും ഗവേഷകൻ ജിയോളജി വിഭാഗം അസോ. പ്രൊഫസർ ഡോ. കെ.സന്ദീപ് പറഞ്ഞു. തടാകത്തിലെ വിവിധ ഭാഗങ്ങളിൽ ശേഖരിച്ച ഉപരിതല അവശിഷ്ടങ്ങളിൽ ഒരു കിലോഗ്രാമിന് 100 മുതൽ 450 വരെ മൈക്രോപ്ലാസ്റ്റിക് കണങ്ങൾ കണ്ടെത്തി.

കണ്ടെത്തിയ കണങ്ങളിൽ ഭൂരിഭാഗവും നാരുകളായിരുന്നു. സിന്തറ്റിക് വസ്ത്രങ്ങൾ, വലകൾ, കയർ, പ്ലാസ്റ്റിക് പാക്കുകൾ തുടങ്ങിയവയിൽനിന്നുള്ള പോളി പ്രൊപ്പിലീൻ, പോളി എത്തിലീൻ കണങ്ങളാണ് കണ്ടെത്തിയത്.

മഴ കുടിയാൽ മൈക്രോപ്ലാസ്റ്റിക്കും കൂടും

മഴ കൂടുതലായ വർഷങ്ങളിൽ അടിഞ്ഞുകൂടിയ മൈക്രോപ്ലാസ്റ്റിക്കിൻ്റെ അളവ കൂടുതലാണെന്ന് പഠനത്തിൽ കണ്ടെത്തിയതായി കേന്ദ്രസർവകലാശാലയിലെ ഡോ. എ.വി.സിജിൻകുമാർ പറഞ്ഞു. തടാകത്തിലെ പാളികൾ വർഷംതോറും മാറുന്ന പരിസ്ഥിതി വ്യതിയാനങ്ങൾ സൂക്ഷിക്കുന്നതിനാൽ, പ്ലാസ്റ്റിക്കുകളെ ഭൂഗർഭ രേഖകളിൽ ഒരു 'സ്ട്രാറ്റിഗ്രാഫിക് അടയാളപ്പെടുത്തലായി ഉപയോഗിക്കാനാകുമെന്ന് ഗവേഷകർ പറഞ്ഞു. മണിപ്പാൽ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ ഡോ. അനീഷ് വാരിയർ, ഗവേഷണ വിദ്യാർഥികളായ ജി.എച്ച്.അരവിന്ദ്, ആർ.എസ്.മഹിദേവ്, അബ്‌ദുൽ ഖാദർ റഫാസ് എന്നിവരും ഗവേഷണത്തിൽ പങ്കാളികളായി. ഡൽഹി എഎൻആർഎഫാണ് ഗവേഷണത്തിന് സഹായധനം നൽകിയത്.