പോളിങ് ഓഫീസർമാർക്കുള്ള പരിശീലനം തുടങ്ങി

കാളികാവ് : തിരഞ്ഞെടുപ്പ് പോളിങ് ഉദ്യോഗസ്ഥർക്ക് മൂന്നു ദിവസത്തെ പരിശീലനം തുടങ്ങി. കാളികാവ് ബ്ലോക്കിനു കീഴിലെ ഏഴു ഗ്രാമപ്പഞ്ചായത്തുകളിലെ 750 പോളിങ് ഉദ്യോഗസ്ഥർ പരിശീലനത്തിൽ പങ്കെടുക്കുന്നുണ്ട്.

ജോയിൻറ് ബിഡിഒ അബ്‌ദുസമദ്, ബിഎൽആർജി ഓഫീസർ സി. പ്രമോദ്, വിഇഒമാരായ നൗഫൽ ഷബീബ് എന്നിവരാണ് പരിശീലനത്തിന് നേതൃത്വം നൽകുന്നത്. ദിവസം 250 പേർക്കാണ് പരിശീലനം.

പോളിങ് ആപ്പ്, വോട്ടിങ് മെഷീൻ, ഇ-ഡ്രോപ് സോഫ്റ്റ്‌വേർ, ഹരിത തിരഞ്ഞെടുപ്പ് എന്നിവയെപ്പറ്റിയാണ് പരിശീലനം. കാളികാവ് ബ്ലോക്കിനു കീഴിലുള്ള പോളിങ് ഉപകരണങ്ങൾ വിതരണം ചെയ്യുന്നതും വോട്ടിങ്ങിനുശേഷം യന്ത്രങ്ങൾ സൂക്ഷിക്കുന്നതും അഞ്ചച്ചവിടി ഗവ. ഹൈസ്‌കൂളിലാണ്.

കാളികാവ് ബ്ലോക്കിനു കീഴിൽ ഏഴു പഞ്ചായത്തുകളിലായി 266 പോളിങ് ബുത്തുകളാണ് ഒരുക്കിയിട്ടുള്ളത്. ഒരു ബൂത്തിൽ സുരക്ഷാ ഉദ്യോഗസ്ഥരെ കൂടാതെ നാലു പോളിങ് ഉദ്യോഗസ്ഥരാണുണ്ടാവുക.

തിരഞ്ഞെടുപ്പ് സംബന്ധിച്ചുള്ള അറിയിപ്പുകളും നിർദേശങ്ങളും വാട്‌സാപ്പ് ഗ്രൂപ്പ് വഴി നൽകും.