പള്ളിക്കുന്ന് പള്ളിയെഅറിയാൻ ഇനി വെബ്സൈറ്റ്

പീരുമേട് : സംസ്ഥാന സർക്കാരിൻ്റെ പൈതൃക വിനോദസഞ്ചാര പദ്ധതിയിൽ ഇടംപിടിച്ച പള്ളിക്കുന്ന് പള്ളിയെ (പഴയ ബ്രിട്ടിഷ് ദേവാലയം) ഇനി വെബ്സൈറ്റിലൂടെ അറിയാം. ബ്രിട്ടിഷ് സെമിത്തേരിയും ഡൗണിയെന്ന കുതിരയുടെ കല്ലറയും ഉൾപ്പെടെ ഏറെ ചരിത്രപ്രാധാന്യം നിറഞ്ഞതാണ് ഇവിടം. വിദേശ മിഷണറി റവ. ഹെൻട്രി ബേക്കർ 156 വർഷം മുമ്പ് സ്ഥാപിച്ച ദേവാലയമാണിത്.

ഇന്നും ഇവിടെ തനിമയോടെ സംരക്ഷിച്ചിരിക്കുന്ന ഫർണിച്ചറുകൾ, ചരിത്ര രേഖകൾ, മൂന്നാറിലെ തേയിലത്തോട്ടങ്ങളുടെ (സ്രഷ്‌ടാവ് ജോൺ ഡാനിയേൽ മൺറോയുടെയും അദ്ദേഹത്തിൻ്റെ ഡൗണി എന്ന കുതിരയുടെയും കഥകൾ, ബ്രിട്ടീഷ് സെമിത്തേരിയിൽ അന്ത്യവിശ്രമംകൊള്ളുന്ന വിദേശികൾ, സഭയിൽ സേവനം അനുഷ്‌ഠിച്ച വിദേശികൾ ഉൾപ്പെടെയുള്ള പുരോഹിതർ, 156 വർഷം പഴക്കുള്ള കാപ്പിച്ചെടി എന്നിവയുടെ ചരിത്രവും പ്രവർത്തനങ്ങളും വെബ്സൈറ്റിൽ ഉൾക്കൊള്ളിച്ചിട്ടുണ്ട്.

ചരിത്രാന്വേഷകർ, സഞ്ചാരികൾ, വിദ്യാർഥികൾ എന്നിവർക്ക് ഏറെ പ്രയോജനപ്രദമാണ് വെബ്സൈറ്റിലെ വിവരങ്ങൾ. വിദേശികളടക്കം ഒട്ടേറെപ്പേരാണ് പള്ളി സന്ദർശിക്കാനെത്തുന്നത്. പൈതൃക ടൂറിസം പദ്ധതിയിൽ ഉൾപ്പെടുത്തി ഒരു കോടിരൂപയാണ് സംസ്ഥാന സർക്കാർ ഇവിടെ അനുവദിച്ചത്. ഒട്ടേറെ സിനിമകളും ഇവിടെ ചിത്രീകരിച്ചിട്ടുണ്ട്.

സൈറ്റിന്റെ ഉദ്ഘാടനം ജില്ലാപഞ്ചായത്ത് പ്രസിഡൻ്റ് രാരിച്ചൻ നീറണാക്കുന്നേൽ നിർവഹിച്ചു. സഭയുടെ ഡിജിറ്റെസേഷൻ പദ്ധതി പീരുമേട് ഗ്രാമപ്പഞ്ചായത്ത് പ്രസിഡന്റ് ആർ. ദിനേശൻ ഉദ്ഘാടനം ചെയ്‌തു. റവ. ലിജു എബ്രഹാം അധ്യക്ഷത വഹിച്ചു. പഞ്ചായത്തംഗം ശാന്തി രമേശ്, വിജു പി.ചാക്കോ, ഐ. മൂവീസ് എന്നിവർ പ്രസംഗിച്ചു. വെബ്സൈറ്റ് ലിങ്ക് https://stgeorgecsichurchofficial.com.