ഗോത്രസംസ്കാരത്തിൻ്റെ ഉൾത്തുടിപ്പ് പകർന്ന് മംഗലംകളി

മുരിക്കാശ്ശേരി മാവിലൻ-വേട്ടുവ ആദിവാസി സമൂഹങ്ങളുടെ വിവാഹാഘോഷങ്ങളിൽ ഒഴിച്ചുകൂടാനാകാത്ത മംഗലംകളി കഴിഞ്ഞ തവണത്തെ സംസ്ഥാന കലോത്സവത്തിൽ പ്രദർശനം എന്ന രീതിയിലായിരുന്നു. എന്നാൽ ഈ വർഷം അതൊരു മത്സര ഇനമായി സ്റ്റേജിലെത്തി. കോറത്തുണിയും മാലയും പാളത്തൊപ്പിയുമടക്കമുള്ള വിവിധ വേഷവിധാനങ്ങളുമായി രണ്ടാംവേദിയിലാണ് മംഗലംകളി അരങ്ങേറിയത്.

കാസർകോടുള്ള മാവിലൻ/മലവേട്ടുവൻ സമുദായത്തിൻന്റെ അനുഷ്ഠാനകല സമുദായത്തിന്റെ സന്തോഷവും സങ്കടവും ജീവിതവുമെല്ലാം പ്രതിഫലിപ്പിക്കുന്നതാണ്.

കഴിഞ്ഞ തവണ രണ്ട് ടീമുകളായിരുന്നെങ്കിൽ ഇത്തവണ ആറ് ടീമുകളാണ് മാറ്റുരച്ചത്. ഹൈസ്‌കൂൾ വിഭാഗം-4, ഹയർസെക്കൻഡറി വിഭാഗം-2 എന്നിങ്ങനെയാണ്. കഴിഞ്ഞ തവണ ഹയർ സെക്കൻഡറി വിഭാഗത്തിൽ ജേതാക്കളായ കുമ്പൻപാറ ഫാത്തിമമാതാ ഹയർ സെക്കൻഡറി സ്കൂ‌ൾ ഇത്തവണയും ജേതാക്കളായി, സംസ്ഥാന തലത്തിൽ എ ഗ്രേഡുമുണ്ടായിരുന്നു.

ഇത്തവണ ഹൈസ്കൂൾ, ഹയർ സെക്കൻഡറി വിഭാഗത്തിലും ഈ സ്‌കൂളാണ് ജേതാക്കൾ.

മാവിലൻ ഗോത്രവർഗത്തിൻ്റെ തുളുഭാഷയും മലവേടുവർ ഗോത്രത്തിന്റെ വാമൊഴിഭാഷയും സമന്വയിപ്പിച്ചാണ് മംഗലംകളി അരങ്ങേറുന്നത്. എട്ടുകളിക്കാരും നാലുപാട്ടുകാരും വേദിയിലുണ്ടാകും.

പുരുഷൻമാരും സ്ത്രീകളും ഒരുമിച്ചാണ് ഇത് അവതരിപ്പിക്കുന്നതെങ്കിലും, മത്സരത്തിൽ ആൺകുട്ടികളുടെ സാന്നിധ്യം ഉണ്ടായിരുന്നില്ല.