കൂരിയാട്ട് ഒന്നേകാൽ കോടിയുടെ കുഴൽപ്പണം പിടിച്ചു

വേങ്ങര (മലപ്പുറം): കാറിൽ രേഖകളില്ലാതെ കടത്തുകയായിരുന്ന 1.25 കോടി രൂപയുടെ കുഴൽപ്പണം കൂരിയാട് അടിപ്പാതയ്ക്കടുത്തുനിന്ന് പിടിച്ചു. കാറിന്റെ പിന്നിലെ വാതിൽപ്പാളിക്കുള്ളിൽ ഒളിപ്പിച്ചനിലയിലായിരുന്നു പണം. കൊടുവള്ളി സ്വദേശികളായ കൈവേലിക്കാവ് അബ്‌ദുറഹീം (43), കുന്നുമേൽ മിൻഹാജ് (25) എന്നിവരെ അറസ്റ്റ്ചെയ്‌തു. കാറും പണവും കസ്റ്റഡിയിലെടുത്തു.

വെള്ളിയാഴ്ച‌ രാവിലെ പത്തുമണിയോടെയാണ് സംഭവം. ജില്ലാ പോലീസ് മേധാവി ആർ. വിശ്വനാഥിന് രഹസ്യവിവരം കിട്ടിയതിനെത്തുടർന്ന് മലപ്പുറം ഡിവൈഎസ്‌പി ബിജുവിൻ്റെ നിർദേശപ്രകാരം വേങ്ങര എസ്എച്ച്‌ഒ വി. അമീറലിയുടെ നേതൃത്വത്തിൽ പോലീസ് നടത്തിയ പരിശോധനയിലാണ് കുഴൽപ്പണം പിടിച്ചത്.

കൊടുവള്ളിയിൽനിന്ന് തിരൂരിലേക്കാണ് പണം കടത്തിയതെന്നാണ് സൂചന. സിപിഒമാരായ സിറാജ്, ഷബീറലി, ലിബിൻ, പിആർഒ ഗണേശൻ എന്നിവരും അന്വേഷണസംഘത്തിലുണ്ടായിരുന്നു.