ഡൽഹി സ്ഫോടനം: സംസ്ഥാനത്തും ജാഗ്രതാ നിർദേശം

തിരുവനന്തപുരം: ഡൽഹി സ്ഫോടനത്തിൻ്റെ പശ്ചാത്തലത്തിൽ സംസ്ഥാനത്തും പോലീസ് ജാഗ്രത ശക്തമാക്കി. റെയിൽവേ, ബസ് സ്റ്റേഷനുകളിലും പൊതുസ്ഥലങ്ങളിലും നിരീക്ഷണത്തിന് കൂടുതൽ പോലീസിനെ നിയോഗിച്ചു. തിരുവനന്തപുരം സെൻട്രൽ റെയിൽവേ സ്റ്റേഷനിലും, തമ്പാനൂർ കെഎസ്ആർടിസി ബസ് സ്റ്റാൻഡിലും പോലീസും ബോംബ് സ്ക്വാഡും, ഡോഗ് സ്‌ക്വാഡും പരിശോധന നടത്തി. അസ്വഭാവികമായും ഉപേക്ഷിക്കപ്പെട്ട നിലയിലും കാണുന്ന പാഴ്‌സലുകളെക്കുറിച്ച് വിവരം കൈമാറണമെന്ന് പോലീസ് അറിയിച്ചു.

സെൻട്രൽ റെയിൽവേ സ്‌റ്റേഷനിൽ റെയിൽവേ സംരക്ഷണസേനയും പരിശോധന കർശനമാക്കി. ട്രെയിനുകളിലും പരിശോധന തുടരുന്നുണ്ട്. സംസ്ഥാന അതിർത്തികളിലും വാഹന പരിശോധന നടക്കുന്നുണ്ട്. റെയിൽവേ സ്റ്റേഷനുകളിലും ബസ് സ്റ്റാൻഡുകളിലും നിരീക്ഷണം കൂട്ടാൻ ജില്ലാ പോലീസ് മേധാവിമാർക്കും നിർദേശം നൽകി. ആശങ്കപ്പെടേണ്ട സാഹചര്യമില്ലെന്നും മുൻകരുതൽ എന്ന നിലയിലാണ് പരിശോധന നടത്തുന്നതെന്നും പോലീസ് അറിയിച്ചു.