പള്ളിയോട സംരക്ഷണം ഒരുകോടി രൂപയുടെ ഭരണാനുമതി

റാന്നി: റാന്നി നിയോജക മണ്ഡലത്തിലെ പള്ളിയോടങ്ങളുമായി ബന്ധപ്പെട്ട വിവിധ പദ്ധതികൾക്ക് ഭരണാനുമതി ലഭിച്ചു. സംസ്ഥാന ബഡ്ജറ്റിൽ 20 ശതമാനം ടോക്കൺ പ്രൊവിഷനോടെ ഒരുകോടി രൂപ നീക്കിവെച്ച റാന്നിയിലെ പള്ളിയോടങ്ങളുടെ സംരക്ഷണം എന്ന പദ്ധതിക്കാണ് സംസ്ഥാന ഇറിഗേഷൻ വകുപ്പിന്റെ ഭരണാനുമതി ലഭിച്ചത്. അഡ്വ. പ്രമോദ് നാരായൺ എംഎൽഎയുടെ നിർദ്ദേശപ്രകാരമാണ് ധനവകുപ്പ് ഈ പദ്ധതി സംസ്ഥാന ബജറ്റിൽ ഉൾപ്പെടുത്തിയത്. നിയോജകമണ്ഡലത്തിലുള്ള 10 പള്ളിയോടങ്ങൾക്കാണ് ഈ തുക അനുവദിച്ചിരിക്കുന്നത്. പെരുമാറ്റച്ചട്ടം നിലവിൽ വരുന്നതിന് തൊട്ടുമുൻപാണ് ഭരണാനുമതി നൽകിക്കൊണ്ടുള്ള ഉത്തരവ് പുറത്തിറങ്ങിയത്.