ജനകീയ കൂട്ടായ്‌മയിൽ ഭൂമി വാങ്ങിനൽകി ആളൂർ പോലീസ് സ്റ്റേഷൻ നിർമിക്കാൻ നാലുകോടി- മന്ത്രി

കല്ലേറ്റുംകര കല്ലേറ്റുംകരയിൽ ആഭ്യന്തരവകുപ്പിന് കൈമാറിയ സ്ഥലത്ത് എസ്റ്റിമേറ്റ് പ്രകാരം നാലുകോടി രൂപ ചെലവഴിച്ച് അത്യാധുനിക സൗകര്യങ്ങളോടെ പോലീസ് സ്‌റ്റേഷൻ നിർമിക്കുമെന്നും നടപടികൾ പുരോഗമിക്കുന്നുണ്ടെന്നും മന്ത്രി ആർ. ബിന്ദു പറഞ്ഞു. ഒമ്പത് വർഷമായി വാടകക്കെട്ടിടത്തിൽ പ്രവർത്തിക്കുന്ന ആളൂർ പോലീസ് സ്‌റ്റേഷന് സ്വന്തമായി കെട്ടിടം നിർമിക്കുന്നതിന് 19 സെന്റ് ഭൂമിയുടെ അനുമതിപത്രം (എൻഒസി) കൈമാറുന്ന ചടങ്ങ് ഉദ്ഘാടനം ചെയ്യുകയായിരുന്നു. கணி.

ആളൂർ പഞ്ചായത്തിൻ്റെ ഉടമസ്ഥതയിലുള്ള 15 സെൻ്റ് ഭൂമിയും പോലീസ് സ്റ്റേഷൻ നിർമാണ ജനകീയസമിതി സ്വകാര്യ വ്യക്തിയിൽനിന്ന് വാങ്ങി പഞ്ചായത്തിന് നൽകിയ നാല് സെൻ്റ് ഭൂമിയും ഉൾപ്പെടെ ആകെ 19 സെന്റ് ഭൂമിയുടെ എൻഒസിയാണ് കൈമാറിയത്.

ആളൂർ പഞ്ചായത്ത് പ്രസിഡൻ്റ് കെ.ആർ. ജോജോ അധ്യക്ഷത വഹിച്ചു. ജില്ലാ പോലീസ് മേധാവി ബി. കൃഷ്‌ണകുമാർ അനുമതിപത്രം ഏറ്റുവാങ്ങി. ജില്ലാ പഞ്ചായത്തംഗം പി.കെ. ഡേവീസ്, തൃശ്ശൂർ റൂറൽ അഡിഷണൽ എസ്‌പി, ടി.എസ്. സിനോജ്, സെഷ്യൽ ബ്രാഞ്ച് ഡിവൈഎസ്‌പി പി.ആർ. ബിജോയ്, രതി സുരേഷ്, ഡേവിസ് തുളുവത്ത്, കെ.ഡി. ജോയ് എന്നിവർ പ്രസംഗിച്ചു.