വാൽപ്പാറയിലേക്ക് ഇ-പാസ് നിലവിൽവന്നു

പൊള്ളാച്ചി : വാൽപ്പാറയിലേക്കു പോകാൻ ഇ-പാസ് നിലവിൽ വന്നതോടെ ആളിയാർ ചെക്പോസ്റ്റിൽ തിരക്കുകൂടി. ഇ-പാസ് ഇല്ലാതെ വരുന്ന വിനോദസഞ്ചാരികളുടെ വാഹനങ്ങൾ ചെക്പോസ്റ്റിൽ നിർത്തി പാസെടുത്തശേഷമാണ് കടത്തിവിടുന്നത്.

നിരോധിത പ്ലാസ്റ്റിക് വസ്‌തുക്കൾ കൊണ്ടുപോകുന്നുണ്ടോ എന്നതും വനംവകുപ്പ് വിശദമായി പരിശോധിക്കുന്നുണ്ട്. മദ്രാസ് ഹൈക്കോടതിയുടെ ഉത്തരവുപ്രകാരമാണ് വാൽപ്പാറയിലേക്ക് നവംബർ ഒന്നുമുതൽ ഇ-പാസ് ഏർപ്പെടുത്തിയത്. ഇതോടെ വാൽപ്പാറയിലേക്കു പോകുന്ന മുഴുവൻ വാഹനങ്ങൾക്കും ഇ-പാസ് നിർബന്ധമാക്കി. വാൽപ്പാറിയൻ താമസിക്കുന്നവർക്ക് ലോക്കൽ പാസ് എടുക്കണം.

ഓൺലൈനായി ഇ-പാസ് എടുത്ത വാഹനങ്ങൾ ചെക്പോസ്റ്റിൽ ചെറിയൊരു പരിശോധനയ്ക്കുശേഷം കടത്തിവിടുന്നുണ്ട്. പാസില്ലാതെ വരുന്ന വാഹനങ്ങൾക്ക് രജിസ്റ്റർ ചെയ്യാൻ ചെക്പോസ്റ്റിൽ പലയിടത്തായി ക്യൂ ആർ കോഡും വെച്ചിട്ടുണ്ട്. ക്യു ആർ കോഡ് സ്‌കാൻചെയ്‌താൽ ഇ-പാസിനുള്ള സൈറ്റിൽ നേരിട്ടെത്താൻ സാധിക്കും. ഇരുചക്രവാഹനങ്ങളിൽ വരുന്നവർ ഉൾപ്പെടെ ഇ-പാസ് എടുത്തിരിക്കണമെന്ന് അധികൃതർ പറഞ്ഞു. സർക്കാർ ബസുകളിൽ വരുന്നവർക്ക് മാത്രമാണ് ഇ-പാസില്ലാതെ യാത്രചെയ്യാൻ അനുമതിയുള്ളത്.

വിനോദസഞ്ചാരത്തിന് വരുന്നവരിൽ ഭൂരിഭാഗവും ഇ-പാസുമായാണ് വരുന്നതെന്ന് അധികൃതർ പറഞ്ഞു. ചെറിയൊരു ശതമാനം മാത്രമാണ് പാസില്ലാതെ വരുന്നത്. നിരോധിത പ്ലാസ്റ്റിക് വസ്‌തുക്കൾ കൊണ്ടുവരുന്നത് തടയാൻ വനംവകുപ്പ് എല്ലായിടത്തും വ്യാപക പരിശോധന നടത്തുന്നുണ്ട്. ചെക്പോസ്റ്റുകളിലെത്തുന്ന വാഹനങ്ങളിൽ വിശദമായ പരിശോധന നടത്തിയശേഷമാണ് കടത്തിവിടുന്നത്. സമാനരീതിയിൽ മലക്കപ്പാറ ചെക്പോസ്റ്റിലും പരിശോധനയുണ്ട്.