അതിദാരിദ്ര്യമുക്ത പ്രഖ്യാപനം: പുതുയുഗപ്പിറവിയെന്ന് മുഖ്യമന്ത്രി

തിരുവനന്തപുരം: "കേരളം ഇന്ന് അതിദാരിദ്ര്യമുക്തമായി മാറിയിരിക്കുന്നു" നിയമസഭയുടെ പ്രത്യേക സമ്മേളനത്തിൽ മുഖ്യമന്ത്രി പിണറായി വിജയന്റെ പ്രഖ്യാപനം കരഘോഷത്തോടെ ഭരണപക്ഷം സ്വീകരിച്ചു. "കേരളത്തിൻ്റെ പുതുയുഗപ്പിറവിയായ ചരിത്രമുഹൂർത്തത്തിനാണ് സാക്ഷ്യംവഹിക്കുന്നത്. നവകേരള നിർമിതിയുടെ ഒരു പ്രധാന നാഴികക്കല്ലുകൂടി പിന്നിട്ടു. ഈ പുതിയ പരീക്ഷണം മറ്റുസംസ്ഥാനങ്ങൾക്ക് പ്രയോജനപ്പെടുത്താൻ കഴിയുന്ന മാതൃകയാകുമെന്ന് പ്രത്യാശിക്കാം." മുഖ്യമന്ത്രി പറഞ്ഞു.

അതിദാരിദ്ര്യം വീണ്ടും തലപൊക്കുന്നില്ലെന്ന് ഉറപ്പുവരുത്തും. ഇപ്പോൾ മുക്തരായവരിൽ ആരും തിരികെ അതിദാരിദ്ര്യത്തിലേക്കു വീഴുന്നില്ലെന്ന് ഉറപ്പുവരുത്താനും ആ കുടുംബങ്ങളുടെ ജീവിതനിലവാരവും സാമൂഹികതുല്യതയും ഉറപ്പുവരുത്താനും ജനപങ്കാളിത്തത്തോടെ ഇടപെടും. ഇതിനുള്ള പ്രവർത്തനങ്ങൾക്ക് രൂപരേഖയായി. അതിദരിദ്രർക്കായി ഭൂമി നൽകിയവർക്കും പിന്നിൽ പ്രവർത്തിച്ചവർക്കും മുഖ്യമന്ത്രി നന്ദി അറിയിച്ചു.

പ്രഖ്യാപനത്തിനുവേണ്ടി മാത്രമാണ് നിയമസഭ സമ്മേളിച്ചത്. ആകെ അരമണിക്കൂറായിരുന്നു സമ്മേളനം. ഇതിനായി ശനിയാഴ്‌ച സഭ ചേർന്നതും അപൂർവതയായി.