ഹരിതകർമസേന കേരളത്തിൻ്റെ ശുചിത്വ സൈന്യമായി മാറി-എം.ബി. രാജേഷ്

മുതുകുളം ഹരിതകർമസേന ഇന്നു കേരളത്തിൻ്റെ ശുചിത്വ സൈന്യമായി മാറിയിട്ടുണ്ടെന്ന് മന്ത്രി എം.ബി. രാജേഷ് പറഞ്ഞു. മുതുകുളം ഗ്രാമപ്പഞ്ചായത്തിൽ കേന്ദ്ര-സംസ്ഥാന സർക്കാരുകളുടെ സഹായത്തോടെ നടപ്പാക്കിയ മെറ്റീരിയൽ കളക്‌ഷൻ ഫെസിലിറ്റി (എംസിഎഫ്) സെന്ററിന്റെ ഉദ്ഘാടനം നിർവഹിക്കുകയായിരുന്നു മന്ത്രി.

സംസ്ഥാനത്തെയാകെ രണ്ടുതവണ പ്ലാസ്റ്റിക് കൊണ്ടുപൊതിയാൻ പറ്റുന്നത്ര മാലിന്യമാണ് ഒറ്റവർഷംകൊണ്ട് ഹരിതകർമസേന ശേഖരിച്ചത്.

ഇത് ദേശീയ മാതൃകയാണ്. സർക്കാർ സ്വീകരിച്ച നടപടികൾകൊണ്ട് സംസ്ഥാനത്ത് മാലിന്യം ശേഖരിക്കുന്നതിൻ്റെ അളവ് കൂടുകയും ഹരിതകർമസേനാംഗങ്ങളുടെ ശമ്പളത്തിൽ വർധനയുണ്ടാക്കാൻ സാധിക്കുകയും ചെയ്തെന്ന് മന്ത്രി പറഞ്ഞു. ഗ്രാമപ്പഞ്ചായത്ത് പ്രസിഡന്റ് കെ.വി. ജ്യോതിപ്രഭ അധ്യക്ഷയായി.

ബെയിലിങ് മെഷിൻ്റെയും കൺവെയർ ബെൽറ്റിൻ്റെയും പ്രവർത്തനോദ്ഘാടനം ജില്ലാ പഞ്ചായത്തംഗം ജോൺ തോമസ് നിർവഹിച്ചു. മുതുകുളം ബ്ലോക്ക് പഞ്ചായത്ത് പ്രസിഡന്റ് ഡി. അംബുജാക്ഷി, ഗ്രാമപ്പഞ്ചായത്ത് വൈസ് പ്രസിഡന്റ് ജി. ലാൽമാളവ്യ, മറ്റു ജനപ്രതിനിധികളായ ഗീതാ ശ്രീജി, ബിന്ദു സുഭാഷ്, സബിതാ വിനോദ്, യു. പ്രകാശ്, മഞ്ജു അനിൽകുമാർ, പഞ്ചായത്ത് സെക്രട്ടറി എൻ. അനിൽകുമാർ, എൽ.എസ്.ജിഡി ഡെപ്യൂട്ടി ഡയറക്‌ടർ ഡി. ഷിൻസ്, ഹരിതകർമസേന കൺസോർഷ്യം സെക്രട്ടറി അശ്വതി തുടങ്ങിയവർ സംസാരിച്ചു.

22.5-സെന്റ് ഭൂമിയിൽ 50 ലക്ഷം രൂപ ചെലവഴിച്ച് ആധുനിക സാങ്കേതികവിദ്യയുടെ സഹായത്തോടെയാണ് എംസിഎഫ് നിർമിച്ചത്.