ശബരിമലയ്ക്ക് 30 മെറ്റൽ ഡിറ്റക്‌ടറുകൾ വാങ്ങും

തിരുവനന്തപുരം: ശബരിമല തീർഥാടനക്കാലത്ത് സുരക്ഷയൊരുക്കുന്നതിനായി സംസ്ഥാന പോലീസ് 30 മെറ്റൽ ഡിറ്റക്‌ടറുകൾകൂടി വാങ്ങും. 81 ലക്ഷം രൂപ ചെലവിൽ ഉപകരണങ്ങൾ വാങ്ങാൻ സർക്കാർ അനുമതി നൽകി. പത്ത് ഡോർ ഫ്രെയിം മെറ്റൽഡിറ്റക്‌ടറും കൈയിൽ കൊണ്ടുനടക്കാവുന്ന 20 ഡിറ്റക്‌ടറുകളുമാണ് വാങ്ങുക.

ശബരിമലയിൽ നേരത്തേയുണ്ടായിരുന്ന 63 മെറ്റൽ ഡിറ്റക്‌ടറുകളിൽ 43 എണ്ണം മാത്രമേ പ്രവർത്തിക്കുന്നുള്ളൂ.

തീർഥാടനക്കാലത്തെ അപ്രതീക്ഷിത ചെലവുകൾക്കായി പോലീസിന് ആറുലക്ഷം അനുവദിക്കും. പത്തനംതിട്ട എസ്‌പിക്ക് നാലുലക്ഷവും ഇടുക്കി എസ്പ‌ിക്ക് രണ്ടുലക്ഷവും കൈമാറും. അതേസമയം, കഴിഞ്ഞ തീർഥാടനക്കാലത്ത് അനുവദിച്ചിരുന്ന തുകയിൽ ആംബുലൻസ്, റിക്കവറി വാൻ വാടക ഒഴികെയുള്ളവ ക്രമപ്രകാരമായിരുന്നില്ലെന്ന് കണ്ടെത്തി. ഈ തുക ഉത്തരവാദിത്വപ്പെട്ട ഉദ്യോഗസ്ഥരുടെ ബാധ്യതയായി കണക്കാക്കി നടപടി സ്വീകരിക്കാൻ പോലീസ് മേധാവിക്ക് നിർദേശംനൽകി.