കുട്ടിയെ തിരുത്തുന്ന ടീച്ചറുടെ ചൂരൽപ്രയോഗം കുറ്റമല്ല -ഹൈക്കോടതി

കൊച്ചി: സ്‌കൂളിലെ അച്ചടക്കം ഉറപ്പാക്കാനും കുട്ടിയെ തിരുത്താനുമായി അധ്യാപകൻ നടത്തിയ ചൂരൽപ്രയോഗം കുറ്റമാകില്ലെന്ന് ഹൈക്കോടതി. അച്ചടക്കം ഉറപ്പാക്കാനും കുട്ടിയെ തിരുത്താനും അധ്യാപകന് അധികാരമുണ്ട്. കുട്ടിയുടെ ചുമതല അധ്യാപകനെ ഏൽപ്പിക്കുമ്പോൾ അത്തരമൊരു അധികാരവും രക്ഷിതാക്കൾ കൈമാറുന്നുണ്ടെന്നും ജസ്റ്റിസ് സി. പ്രതീപ് കുമാർ പറഞ്ഞു. തമ്മിൽത്തല്ലിയ മൂന്ന് അഞ്ചാംക്ലാസ് വിദ്യാർഥികളുടെ കാലിൽ ചൂരലുകൊണ്ട് അടിച്ചതിന് അധ്യാപകൻ്റെപേരിൽ പോലീസെടുത്ത കേസ് റദ്ദാക്കിയ ഉത്തരവിലാണ് ഹൈക്കോടതിയുടെ നിരീക്ഷണം. കുട്ടികളിലൊരാളുടെ രക്ഷിതാവിൻ്റെ പരാതിയിലാണ് പോലീസ് കേസെടുത്തത്.

വടക്കാഞ്ചേരി പോലീസ് രജിസ്റ്റർചെയ്‌ത കേസ് റദ്ദാക്കണമെന്നാവശ്യപ്പെട്ട് യുപി സ്കൂൾ അധ്യാപകൻ നൽകിയ ഹർജിയിലാണ് ഉത്തരവ്. അടികൂടിയ കുട്ടികളെ തടയുകയല്ലാതെ മറ്റൊരു ഉദ്ദേശ്യവും തനിക്കുണ്ടായിരുന്നില്ലെന്ന് അധ്യാപകൻ വാദിച്ചു.

നല്ലപൗരരായി വളരാനുള്ള ശിക്ഷയായിട്ടേ അതിനെ കാണാനാകൂ എന്നും അധ്യാപകന്റെ നല്ല ഉദ്ദേശ്യത്തെ രക്ഷിതാക്കൾ തിരിച്ചറിയാത്തത് ദൗർഭാഗ്യകരമാണെന്നും കോടതി പറഞ്ഞു.