അതിദരിദ്രരില്ലാത്ത കേരളം: ആഘോഷമാക്കാൻ താരങ്ങൾ; ചടങ്ങിന് മോഹൻലാലും മമ്മൂട്ടിയും കമൽഹാസനും

തിരുവനന്തപുരം: അതിദരിദ്രരില്ലാത്ത ആദ്യ സംസ്ഥാനമായി കേരളം മാറുന്നതിന്റെ പ്രഖ്യാപനം നവംബർ ഒന്നിനു നടക്കും. സെൻട്രൽ സ്റ്റേഡിയത്തിൽ മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. നടന്മാരായ കമൽഹാസൻ, മമ്മൂട്ടി, മോഹൻലാൽ എന്നിവർ പങ്കെടുക്കുമെന്ന് മന്ത്രിമാരായ എം.ബി.രാജേഷും വി.ശിവൻകുട്ടിയും പത്രസമ്മേളനത്തിൽ പറഞ്ഞു. ഉദ്ഘാടനച്ചടങ്ങിനോടനുബന്ധിച്ച് കലാപരിപാടികളുമുണ്ടാകും.

ചടങ്ങിനൊപ്പം തദ്ദേശസ്ഥാപനങ്ങളിലും ആഘോഷം സംഘടിപ്പിക്കും. പ്രതിപക്ഷ നേതാവിനെയും ചടങ്ങിനു ക്ഷണിച്ചിട്ടുണ്ട്. രണ്ടാം പിണറായി സർക്കാറിൻ്റെ പ്രഥമ മന്ത്രിസഭായോഗത്തിലെ തീരുമാനമാണ് നടപ്പാകുന്നതെന്ന് മന്ത്രി രാജേഷ് പറഞ്ഞു. 59,277 കുടുംബങ്ങളാണ് അതിദരിദ്ര പട്ടികയിലുള്ളത്. ഇവരെയെല്ലാം അതിദാരിദ്ര്യത്തിൽനിന്നു മോചിപ്പിച്ചാണ് പദ്ധതി യാഥാർത്ഥ്യമാക്കുന്നത്. ആദ്യ സർവേയിൽ 64,006 അതിദരിദ്ര കുടുംബങ്ങളെയാണ് കണ്ടെത്തിയത്. ഇതിൽ 4421 കുടുംബങ്ങൾ ഒഴിവാക്കപ്പെട്ടു. നാടോടികളായ 261 കുടുംബങ്ങളെ കണ്ടെത്താനായിട്ടില്ല.