സ്ത്രീകൾക്ക് പ്രാദേശികമായി തൊഴിൽ നൽകാൻ നടപടി സ്വീകരിക്കും - ടി.എം. തോമസ് ഐസക്

കാസർകോട്: സ്ത്രീകൾക്ക് പ്രാദേശികമായി തൊഴിൽ നൽകാനുള്ള

നടപടികൾ സ്വീകരിക്കുമെന്ന് വിജ്ഞാനകേരളം ഉപദേഷ്ട‌ാവ് ഡോ. ടി.എം.തോമസ് ഐസക് പറഞ്ഞു. വിജ്ഞാനകേരളം ജില്ലാ മിഷൻ ഓഫീസും കൺവർജൻസ് യോഗവും ഉദ്ഘാടനം ചെയ്യുകയായിരുന്നു അദ്ദേഹം.

സ്ത്രീകൾ സാമ്പത്തിക സ്വയംപര്യാപ്‌തത നേടുന്നത് പ്രാദേശിക സാമ്പത്തിക വികസനത്തിലേക്ക് നയിക്കുമെന്നും ഇതിനായി സ്ത്രീകളെ കണ്ടെത്തി വിജ്ഞാനകേരളം പോർട്ടലിൽ രജിസ്റ്റർ ചെയ്യേണ്ടതുണ്ടെന്നും അദ്ദേഹം പറഞ്ഞു. കുട്ടികൾക്ക് തൊഴിൽ കേന്ദ്രീകൃത പരിശീലനം ഉറപ്പാക്കുമെന്നും സ്വാശ്രയ കോളേജുകളിലും ആർട്‌സ് ആൻഡ് സയൻസ് കോളേജുകളിലും തൊഴിൽ കണ്ടെത്താൻ പ്രത്യേക ഇടപെടൽ നടത്തും.

കിടപ്പുരോഗികൾക്ക് ആവശ്യമായ സഹായം നൽകാനായി പാലിയേറ്റീവ് ഹെൽത്ത് കെയറുമായി ബന്ധപ്പെടുത്തി ജോലി ലഭ്യമാക്കുമെന്നും അദ്ദേഹം പറഞ്ഞു.

ജില്ലാപഞ്ചായത്ത് പ്രസിഡൻ്റ് ബേബി ബാലകൃഷ്‌ണൻ അധ്യക്ഷത വഹിച്ചു. എം.രാജഗോപാലൻ എംഎൽഎ, ജില്ലാപഞ്ചായത്ത് വൈസ് പ്രസിഡന്റ് ഷാനവാസ് പാദൂർ, കെ.വി.രഞ്ജിത്ത്, കെ.എം.കിഷോർകുമാർ, കെ.ശകുന്തള, എസ്.എൻ.സരിത, ഡോ. അശോകൻ, സജിത്ത് പാലേരി, ആർ.ഷൈനി എന്നിവർ സംസാരിച്ചു.