ജിഡി നായിഡു മേൽപ്പാലത്തിൽ 40 ക്യാമറകൾ സ്ഥാപിക്കും

കോയമ്പത്തൂർ: അവിനാശി റോഡിലെ ജിഡി നായിഡു മേല്പാലത്തിൽ

അമിതവേഗം നിയന്ത്രിക്കാൻ 40 സിസിടിവി ക്യാമറകൾ സ്ഥാപിക്കുമെന്ന് പോലീസ്. 10.10 കിലോമീറ്റർ നീളമുള്ള പാലത്തിൽ നിർമിതബുദ്ധി ഉപയോഗിച്ച് പ്രവർത്തിക്കുന്ന ക്യാമറകളാണ് സ്ഥാപിക്കുക. പാലത്തിൽ മണിക്കൂറിൽ 60 കിലോമീറ്ററും കയറുകയും ഇറങ്ങുകയും ചെയ്യുന്ന സ്ഥലങ്ങളിൽ 30 കിലോമീറ്ററുമാണ് വേഗം നിശ്ചയിച്ചത്.

എന്നിട്ടും അമിത വേഗത്തിൽ വാഹനമോടിക്കുന്നത് ശ്രദ്ധയിൽപ്പെട്ടതോടെയാണ് ക്യാമറ സ്ഥാപിക്കുന്നത്. പാലത്തിൽനിന്ന് അവിനാശിറോഡിലിറങ്ങുന്ന സ്ഥലങ്ങളിൽ റബ്ബർകൊണ്ടുള്ള വേഗത്തടകൾ സ്ഥാപിച്ചിട്ടുണ്ടെന്ന് കളക്‌ടർ ജി. പവൻകുമാർ പറഞ്ഞു. ഉപ്പിലിപാളയം റൗണ്ടാനയിൽ സിഗ്നലുകളും സ്ഥാപിച്ചു. ഇതോടെ റൗണ്ടാനയിലെ ഗതാഗതക്കുരുക്ക് പരിഹരിക്കാൻ കഴിഞ്ഞിട്ടുണ്ട്. ക്യാമറകൾ കൂടി സ്ഥാപിക്കുന്നതോടെ അമിതവേഗം നിയന്ത്രിക്കാൻ സാധിക്കും. നിയമം ലംഘിക്കുന്നവർക്കെതിരേ ശക്തമായ നടപടി സ്വീകരിക്കുമെന്ന് കളക്‌ടർ പറഞ്ഞു. ഇതോടൊപ്പം മേല്പാലത്തിൽ നിശ്ചിത അകലത്തിൽ മുന്നറിയിപ്പ് ബോർഡുകളും സ്ഥാപിക്കും.