മീൻപിടിക്കുന്നതിനിടെ പുഴയിൽ വീണ് മത്സ്യത്തൊഴിലാളിയെ കാണാതായി

വലിയപറമ്പ്: വലിയപറമ്പ് പാലത്തിന് സമീപം മീൻപിടിക്കുന്നതിനിടയിൽ പുഴയിൽ വീണ മത്സ്യത്തൊഴിലാളിയെ കാണാതായി. വലിയപറമ്പ് പാലത്തിന് സമീപത്തെ എൻ.പി. തമ്പാനെ(63)യാണ് കാണാതായത്. ഞായറാഴ്‌ച രാവിലെ 10.15-ഓടെയാണ് സംഭവം. തമ്പാൻ്റെ തോണിയും അതിൽ മൊബൈൽഫോണും സമീപത്തായി ഉണ്ടായിരുന്നു.

മത്സ്യത്തൊഴിലാളികളും നാട്ടുകാരും തൃക്കരിപ്പൂർ അഗ്നിരക്ഷാസേനയും കണ്ണൂരിൽ നിന്നെത്തിയ സ്‌കൂബാ ടീമും വൈകീട്ടുവരെ തിരച്ചിൽ നടത്തിയെങ്കിലും തമ്പാനെ കണ്ടെത്താനായില്ല. അടിയൊഴുക്കും ആഴവുമുള്ള സ്ഥലമാണിത്. തിങ്കളാഴ്‌ചയും തിരിച്ചിൽ തുടരുമെന്ന് അഗ്നിരക്ഷാസേന അറിയിച്ചു. തിരച്ചലിന് കളക്‌ടർ കെ. ഇമ്പശേഖർ നേവിയുടെ സഹായവും അഭ്യർഥിച്ചിട്ടുണ്ട്.