ഇടുക്കിയിൽ പേമാരിയുടെ താണ്ഡവം; നെടുങ്കണ്ടം പ്രളയക്കെടുതിയിൽ, കല്ലാർ ഡാം തുറന്നു

കല്ലാർ ഡാം തുറന്നു; സംഹാരരുദ്രയായി പുഴ

ജലനിരപ്പ് ക്രമാതീതമായി ഉയർന്നതോടെ കല്ലാർ ഡാമിന്റെ ഷട്ടറുകൾ പൂർണമായി ഉയർത്തേണ്ടി വന്നു. 2018-ലെ മഹാപ്രളയത്തിന് ശേഷം ആദ്യമായാണ് ഡാമിന്റെ ഷട്ടറുകൾ പൂർണ്ണമായി ഉയർത്തുന്നത്. ഡാം തുറന്നുവിട്ടതോടെ കല്ലാർ പുഴ കരകവിഞ്ഞൊഴുകി സംഹാരരുദ്രയായി മാറി. കുതിച്ചെത്തിയ ശക്തമായ പ്രളയജലത്തിൽ നിരവധി വീടുകൾ വെള്ളത്തിനടിയിലായി. ജലപ്രവാഹത്തിന്റെ ശക്തിക്ക് ഷട്ടറുകൾ പൂർണ്ണമായി ഉയർത്തിവെച്ചിട്ടും ശമനമുണ്ടായില്ല.

പ്രളയം വിഴുങ്ങിയ പ്രദേശങ്ങൾ

കൂട്ടാർ, തേർഡ് ക്യാമ്പ്, സന്യാസിയോട, മുണ്ടിയെരുമ, തൂക്കുപാലം, താന്നിമൂട്, കല്ലാർ, ചിന്നാർ, കള്ളർമുക്ക് തുടങ്ങിയ ചെറിയ ടൗണുകളെയും പ്രകൃതിരമണീയമായ തൂവൽ പ്രദേശത്തെയും പ്രളയം വിഴുങ്ങി. കട്ടപ്പനയിൽ വീടിനു മുന്നിലേക്ക് കല്ലും മണ്ണും വെള്ളവും ഇരച്ചുകയറി. കൂട്ടാറിൽ നിർത്തിയിട്ടിരുന്ന ഒരു ട്രാവലർ മഴവെള്ളപ്പാച്ചിലിൽ ഒഴുകിപ്പോയത് ദുരന്തത്തിന്റെ വ്യാപ്തി വെളിപ്പെടുത്തുന്നു. പല സ്ഥലങ്ങളിലും നിലച്ച വൈദ്യുതി പുനഃസ്ഥാപിക്കാൻ ഇതുവരെ കഴിഞ്ഞിട്ടില്ല.

ജാഗ്രതാ നിർദ്ദേശം തുണയായി

അർദ്ധരാത്രിയോടെ കല്ലാറിലെ ജലനിരപ്പ് ഉയർന്നുവെന്ന മുന്നറിയിപ്പ് പ്രാദേശിക വാട്‌സ്ആപ്പ് ഗ്രൂപ്പുകളിലൂടെ സമയബന്ധിതമായി ലഭിച്ചത് പലർക്കും സുരക്ഷിത സ്ഥാനങ്ങളിലേക്ക് മാറാൻ സഹായകമായി. ഇതിനിടെ മുല്ലപ്പെരിയാർ ഷട്ടറുകൾ തുറന്നുവിട്ടതായി തമിഴ്‌നാട് അറിയിച്ചു. പെരിയാറിന്റെ നീരൊഴുക്ക് കൂടുന്നത് തീരവാസികളുടെ ജാഗ്രത അനിവാര്യമാക്കുന്നു.

ദുരന്തമുഖത്തും തൂവലിന്റെ ഭീകര സൗന്ദര്യം

ഇടുക്കിയിലെ പ്രധാന വെള്ളച്ചാട്ടങ്ങളിലൊന്നായ തൂവൽ വെള്ളച്ചാട്ടം (തൂവലരുവി) പേമാരിയിൽ അതിന്റെ സംഹാര രൂപം പൂണ്ട കാഴ്ചയാണ് നെടുങ്കണ്ടം സാക്ഷ്യം വഹിച്ചത്. ഇടുക്കിയുടെ കാർഷിക-വാണിജ്യ മേഖലയുടെ നട്ടെല്ലായ കട്ടപ്പന, നെടുങ്കണ്ടം പ്രദേശങ്ങൾ കനത്ത നാശനഷ്ടങ്ങൾ നേരിടുകയാണ്.

റിപ്പോർട്ട്: ബിജു കാരക്കോണം. (ചിത്രങ്ങൾ: ഡിയോൺ, തൂവൽ)