നവജാതശിശുക്കളിൽ ജനിതകവൈകല്യം കൂടുന്നു; ഏറ്റവും കൂടുതൽ തിരുവനന്തപുരത്ത്

തിരുവനന്തപുരം: ജനിതകവൈകല്യങ്ങളോടെ ജനിക്കുന്ന കുട്ടികളുടെ എണ്ണം സംസ്ഥാനത്ത് കൂടുന്നതായി നിയമസഭാസമിതിയുടെ കണ്ടെത്തൽ. നവജാതശിശുക്കളിലെ സൂക്ഷ്‌മരോഗനിർണയപദ്ധതിയുടെ ഭാഗമായി നടത്തിയ പരിശോധനയിൽ ലഭിച്ചതാണ് ഈ കണക്കുകൾ. ജനിതകവൈകല്യങ്ങളോടെ ജനിച്ച കുട്ടികൾ 2021-ൽ 2635 ആയിരുന്നു. 2022-ൽ ഇത് 3232 ആയും 2023-ൽ 4779 ആയും കൂടി. ഇതിന്റെ കാരണം കണ്ടെത്താൻ പഠനം നടത്തണമെന്ന് കെ.കെ. ശൈലജ അധ്യക്ഷയായ നിയമസഭാ എസ്റ്റിമേറ്റ് കമ്മിറ്റി ശുപാർശ ചെയ്തു.

വൈകല്യബാധിതർ തിരുവനന്തപുരം ജില്ലയിലാണ് കൂടുതൽ മൂന്നുവർഷത്തെ കണക്കിൽ കൊല്ലം, മലപ്പുറം, കോഴിക്കോട് ജില്ലകളിലും രോഗബാധിതർ കൂടുതലാണ്. രോഗബാധിതരുടെ എണ്ണംമാത്രമേ സമിതിക്കുമുൻപാകെ ലഭിച്ചിട്ടുള്ളൂ. ഓരോയിടത്തെയും പരിശോധനയുടെ എണ്ണംകൂടി ലഭിച്ചാലേ ഏതെങ്കിലും പ്രത്യേക ജില്ലയിൽ ജനിതകവൈകല്യം കൂടുതലാണോയെന്ന് അറിയാനാകൂവെന്ന് സമിതി അഭിപ്രായപ്പെട്ടു.

ആരോഗ്യവകുപ്പിൻ്റെ 'ശലഭം' പദ്ധതിയുടെ ഭാഗമായി 2024-ൽ മെഡിക്കൽ കോളേജുകളിൽ നടത്തിയ പരിശോധനയിലും തിരുവനന്തപുരം ജില്ലയിലാണ് വൈകല്യബാധിതർ കൂടുതൽ

ജനിതകവൈകല്യബാധിതരുടെ ജില്ലതിരിച്ചുള്ള കണക്ക്

ജില്ല 2021 2022 2023

തിരുവനന്തപുരം 379 733 1237

കൊല്ലം 330 423 775

മലപ്പുറം 268 334 593

കോഴിക്കോട് 158 201 404

പാലക്കാട് 233 225 276

ഇടുക്കി 105 176 233

കോട്ടയം 119 157 232

തൃശ്ശൂർ 198 193 212

പത്തനംതിട്ട 63 99 173

ആലപ്പുഴ 163 187 170

വയനാട് 310 158 146

എറണാകുളം 94 119 141

കണ്ണൂർ 63 125 106

കാസർകോഡ് 5 152 10281

ആകെ (106) 2635 3232 4779

തുക ചെലവഴിക്കുന്നതിൽ വീഴ്ച്‌ച

സൂക്ഷ്മരോഗനിർണയപദ്ധതിക്കായി ഓരോ വർഷവും ചെലവഴിക്കുന്ന തുക ഗണ്യമായി കുറഞ്ഞുവരുന്നതായും സമിതി നിരീക്ഷിച്ചു.

കാരണങ്ങൾ ഏറെ

ജനങ്ങളിൽ അവബോധം കൂടിയതിനാൽ നവജാതശിശുക്കളിലെ ജനിതകവൈകല്യം കണ്ടുപിടിക്കുന്നതാണ് എണ്ണം കൂടാനുള്ള മുഖ്യകാരണം. മാതാപിതാക്കളുടെ പ്രായക്കൂടുതൽ, വൈകിയുള്ള ഗർഭധാരണം, ജീവിതശൈലിരോഗങ്ങൾ തുടങ്ങിയവ ജനിതകവൈകല്യങ്ങൾക്ക് കാരണങ്ങളാവാം. ഭക്ഷണക്രമം, മൊബൈൽ ഉപയോഗം തുടങ്ങി ദൈനംദിനജീവിതത്തിലെ മാറ്റങ്ങളും സ്വാധീനിക്കാം-ഡോ. വി.എച്ച്. ശങ്കർ, ജനിതകവിഭാഗം മേധാവി, എസ്എടി ആശുപത്രി, മെഡിക്കൽ കോളേജ്, തിരുവനന്തപുരം