സാഹസികതയുടെ ഓളങ്ങളുമായി ചാലിയാർ റിവർ പാഡിൽ സമാപിച്ചു

നിലമ്പൂർ: ദീർഘദൂര ബോധവത്‌കരണ സാഹസിക കയാക്കിങ് യാത്രയായ ചാലിയാർ റിവർ പാഡിൽ സമാപിച്ചു. നിലമ്പൂർ മാനവേദൻ ഹയർസെക്കൻഡറി സ്കൂ‌ളിന് സമീപത്തുള്ള കടവിൽനിന്ന് വെള്ളിയാഴ്‌ച തുടങ്ങിയ യാത്ര ഞായറാഴ്ച വൈകിട്ടാണ് ചെറുവണ്ണൂരിലെ ജെല്ലിഫിഷ് വാട്ടർ സ്പോർട്സ് ക്ലബ്ബിൽ സമാപിച്ചത്.

ചാലിയാറിനെ സംരക്ഷിക്കാനും ജലസാഹസിക വിനോദം പ്രോത്സാഹിപ്പിക്കാനുമായി നടത്തുന്ന ദീർഘദൂര കയാക്കിങ് ബോധവത്കരണ യാത്ര പതിനൊന്നാം തവണയാണ് സംഘടിപ്പിക്കുന്നത്. കോഴിക്കോട് കേന്ദ്രമായി പ്രവർത്തിക്കുന്ന ജെല്ലിഫിഷ് വാട്ടർ സ്പോർട്‌സ് ക്ലബ്ബാണ് യാത്ര സംഘടിപ്പിച്ചത്.

ജെല്ലിഫിഷ് വാട്ടർ സ്പോർട്‌സ് ക്ലബ്ബിൽ വൈകീട്ട് നടന്ന സമാപനച്ചടങ്ങിൽ ബേപ്പൂർ കോസ്റ്റ് ഗാർഡ് അസിസ്റ്റൻ്റ് കമൻഡാൻ്റ് കെ.ടി. വരുൺ, ഹരിഹരസുതൻ, വിപിൻ മിശ്ര, അമിത് തിവാരി, ജെല്ലിഫിഷ് വാട്ടർ സ്പോർട്‌സ് സ്ഥാപകൻ കൗഷിക്ക് കോടിത്തോടിക, മാനേജിങ് ഡയറക്‌ടർ റിൻസി ഇക്ബാൽ, മാനേജർ പ്രസാദ് തുമ്പാണി, ചെറുവണ്ണൂർ പൗരസമിതി പ്രസിഡന്റ്റ് കെ. ഉദയകുമാർ, സെക്രട്ടറി എം. ഗോപാലകൃഷ്‌ണൻ എന്നിവർ പ്രസംഗിച്ചു. മൂന്ന് ദിവസങ്ങളിലായി 2000 കിലോ മാലിന്യമാണ് സംഘം ചാലിയാറിൽനിന്ന് ശേഖരിച്ചത്. പുഴയിൽനിന്ന് ശേഖരിച്ച മാലിന്യത്തിൻ്റെ തോത് നാട്ടുകാരെയും കുട്ടികളെയും ജനപ്രതിനിധികളെയും ബോധ്യപ്പെടുത്തി.