ചെങ്ങന്നൂരിൽ കഫെ കുടുംബശ്രീ പ്രീമിയം റെസ്റ്ററൻറ് തുറന്നു

തിരുവൻവണ്ടൂർ കുടുംബശ്രീയുടെ നൂതന സംരംഭമായ കഫെ കുടുംബശ്രീ പ്രീമിയം റെസ്റ്ററന്റ് ചെങ്ങന്നൂരിൽ പ്രവർത്തനമാരംഭിച്ചു. എംസി റോഡിൽ തിരുവൻവണ്ടൂർ കല്ലിശ്ശേരി ജങ്ഷനിലാണ് ഭക്ഷണശാല തുറന്നത്. മന്ത്രി സജി ചെറിയാൻ ഉദ്ഘാടനം ചെയ്‌തു. ജില്ലാ പഞ്ചായത്തംഗം വത്സലാമോഹൻ അധ്യക്ഷയായി.

ജില്ലയിലെ ആദ്യ പ്രീമിയം റെസ്റ്ററൻ്റ് ശാഖയാണ് ചെങ്ങന്നൂരിൽ ആരംഭിച്ചത്. രാവിലെ ആറുമുതൽ മാത്രി 11 വരെയാണ് പ്രവൃത്തിസമയം. പൂർണമായി ശീതികരിച്ച ഭക്ഷണശാലയോടനുബന്ധിച്ച് വിശാലമായ പാർക്കിങ് സൗകര്യവുമുണ്ട്. കുടുംബശ്രീയുടെ തനത് ഉത്‌പന്നങ്ങൾ വാങ്ങുന്നതിനുള്ള നാനോ മാർക്കറ്റും റസ്റ്ററൻറിൽ ഒരുക്കിയിട്ടുണ്ട്.

തദേശസ്വയംഭരണ വകുപ്പ് അസിസ്റ്റൻ്റ് ഡയറക്‌ടർ പ്രശാന്ത് ബാബു, ചെങ്ങന്നൂർ നഗരസഭാധ്യക്ഷ ശോഭാവർഗീസ്, താലൂക്ക് സർക്കിൾ സഹകരണ യൂണിയൻ ചെയർമാൻ എം. ശശികുമാർ, ഫോക്ലോർ അക്കാദമി ചെയർമാൻ ഒ.എസ്. ഉണ്ണിക്കൃഷ്ണൻ, പഞ്ചായത്ത് പ്രസിഡൻറുമാരായ പുഷ്പലതാമധു, എം.ജി. ശ്രീകുമാർ, നഗരസഭാ ഉപാധ്യക്ഷൻ കെ. ഷിബുരാജൻ, ബീനാബിജു, രോഹിത് പി. കുമാർ, ജൂണി കുതിരവട്ടം എന്നിവർ സംസാരിച്ചു.