നാരായണഗുരു വിശ്വഗുരു -എ.എൻ.ഷംസീർ

തലശ്ശേരി : മഹാനായ വിശ്വഗുരുവാണ് ശ്രീനാരായണഗുരുവെന്ന് സ്പീക്കർ എ.എൻ.ഷംസീർ പറഞ്ഞു. കുട്ടിമാക്കൂൽ ശ്രീനാരായണ സാംസ്കാരിക കേന്ദ്രത്തിന്റെ ശ്രീനാരായണഗുരുജയന്തിയാഘോഷം മുഴിക്കര കോടിയേരി സർവീസ് സഹകരണ ബാങ്ക് ഓഡിറ്റോറിയത്തിൽ ഉദ്ഘാടനം ചെയ്യുകയായിരുന്നു അദ്ദേഹം.

നവോത്ഥാനത്തിന് ശിലയിട്ട ഗുരു താത്ത്വികനായിരുന്നു. ഗുരുവിനെക്കുറിച്ച് ഓസ്ട്രേലിയൻ പാർലമെൻറ് ചർച്ചചെയ്യാൻ പോകുകയാണ്. ഗുരു മുന്നോട്ടുവെച്ച ദർശനം വഴിമാറി നടക്കാൻ പ്രേരിപ്പിക്കുന്ന ഘട്ടത്തിൽ ഗുരുദർശനം മുറുകെപ്പിടിക്കാൻ കഴിയണമെന്നും സ്‌പീക്കർ പറഞ്ഞു.

കെ.പി.ജ്യോതിബാസ് അധ്യക്ഷനായി. രാജേഷ് കടന്നപ്പള്ളി, ഷെറീന മോഹൻദാസ്, ഷജില സുധാകർ, എം.വി.ബാലറാം, യു.ബ്രിജേഷ് എന്നിവർ സംസാരിച്ചു.