ശിശുമരണനിരക്കിൽ അമേരിക്കയെ പിന്നിലാക്കി കേരളം

തിരുവനന്തപുരം: സംസ്ഥാനത്തെ ശിശുമരണനിരക്ക് അമേരിക്കയിലേതിനെക്കാൾ കുറവ്, 2021-ൽ 1000 കുഞ്ഞുങ്ങളിൽ ആറുപേർ ആണ് മരിച്ചിരുന്നതെങ്കിൽ പുതിയ സാംപിൾ രജിസ്ട്രേഷൻ സിസ്റ്റം സ്റ്റാറ്റിസ്റ്റിക്കൽ റിപ്പോർട്ടുപ്രകാരം 2023-ൽ അഞ്ച് ആയി കുറഞ്ഞത് പൊതുജനാരോഗ്യരംഗത്ത് നാഴികക്കല്ലാണെന്ന് മന്ത്രി വീണാജോർജ് അറിയിച്ചു. ദേശീയ ശരാശരി 25 ആണ്. യുഎസിൽ 5.6 ആണ്.

അഭിമാനനേട്ടത്തിനൊപ്പം പ്രവർത്തിച്ച ആരോഗ്യപ്രവർത്തകരെയും മറ്റു സഹപ്രവർത്തകരെയും മന്ത്രി അഭിനന്ദിച്ചു. ജന്മനായുള്ള വൈകല്യങ്ങ നേരത്തേ കണ്ടെത്തി ചികിത്സിക്കുന്നതിനായി പ്രസവംനടക്കുന്ന എല്ലാ ആശുപത്രികളിലും സമഗ്ര ന്യൂബോൺ സ്ക്രീനിങ് പദ്ധതി നടപ്പാക്കി. ജന്മനായുള്ള ഹൃദയവൈകല്യം കണ്ടെത്തി സൗജന്യമായി ചികിത്സിക്കുന്ന 'ഹൃദ്യം' പദ്ധതി നടപ്പാക്കിയിട്ടുണ്ട്. ഇതുവരെ 8450 കുഞ്ഞുങ്ങൾക്ക് സൗജന്യ ഹൃദയശസ്ത്രക്രിയ നടത്തി. അപൂർവ ജനിതകരോഗങ്ങൾക്ക് സൗജന്യചികിത്സ നൽകുക വഴി അതുമൂലമുള്ള മരണങ്ങൾ കുറയ്ക്കാൻ സാധിച്ചതായും മന്ത്രി പറഞ്ഞു.