ഓണാഘോഷം: മന്ത്രിമാരുടെ ക്ഷണം സ്വീകരിച്ച് ഗവർണർ

തിരുവനന്തപുരം: ഓണം വാരാഘോഷത്തിൽ പങ്കെടുക്കാനുള്ള സർക്കാരിന്റെ ക്ഷണം സ്വീകരിച്ച് ഗവർണർ രാജേന്ദ്ര വിശ്വനാഥ് ആർലേക്കർ. മന്ത്രിമാരായ വി. ശിവൻകുട്ടിയും മുഹമ്മദ് റിയാസും ഓണസമ്മാനങ്ങളുമായി രാജ്‌ഭവനിലെത്തിയാണ് ഗവർണറെ ക്ഷണിച്ചത്. ഇടക്കാലത്ത് സർക്കാരുമായി ഉണ്ടായ അസ്വാരസ്യംമറന്ന് ഇരുകൂട്ടരും സൗഹൃദംപങ്കിട്ടു. ആറന്മുള കണ്ണാടി, ആമാടപ്പെട്ടി എന്നിവയും രണ്ട് ജോഡി ഓണക്കോടിയും മന്ത്രിമാർ സമ്മാനമായി നൽകി.

ഒൻപതാംതീയതി ഓണം വാരാഘോഷത്തിന് സമാപനംകുറിക്കുന്ന ഘോഷയാത്ര ഫ്ളാഗ് ഓഫ് ചെയ്യാനായിരുന്നു മന്ത്രിമാരുടെ ക്ഷണം. ഓണം എല്ലാവരുടേതുമല്ലേയെന്നും ഇതിൽ പങ്കെടുക്കുന്നതിൽ സന്തോഷമാണെന്നും പറഞ്ഞ് ഗവർണർ ക്ഷണം സ്വീകരിച്ചു. ഓണാഘോഷപരിപാടികൾ തയ്യാറാക്കുകയും നോട്ടീസ് അച്ചടിക്കുകയും ചെയ്‌തിട്ടും ഗവർണറെ ക്ഷണിക്കാഞ്ഞത് വാർത്തയായിരുന്നു.