ഹരിതകർമസേനാംഗങ്ങൾക്ക് ഓണക്കോടിയും ബോണസും

പെരിന്തൽമണ്ണ: പെരിന്തൽമണ്ണ നഗരസഭയിലെ ഹരിതകർമസേനാംഗങ്ങൾക്ക് ഓണത്തോടനുബന്ധിച്ച് ഓണക്കിറ്റ്, ബോണസ്, ഓണക്കോടി എന്നിവ വിതരണംചെയ്തു.

മുൻ പെരിന്തൽമണ്ണ എംഎൽഎയും ബിൽഡിങ് ആൻഡ് വർ കൺസ്ട്രക്ഷൻ വർക്കേഴ്‌സ് വെൽഫെയർ ബോർഡ് ചെയർമാനുമായ വി ശശികുമാർ ഉദ്ഘാടനംചെയ്‌തു. നഗരസഭാ കോൺഫറൻസ് ഹാളിൽ നടന്ന പരിപാടിയിൽ നഗരസഭാ അധ്യക്ഷൻ പി. ഷാജി അധ്യക്ഷനായി.

വൈസ് ചെയർപേഴ്‌സൺ എ. നസീറ, നഗരസഭാ സെക്രട്ടറി ജെ.ആർ. ലാൽകുമാർ, ഹരിതകർമസേന കോഡിനേറ്ററും കൗൺസിലറുമായ പി.എസ്. സന്തോഷ്കുമാർ, ഹരിതകർമസേന പ്രസിഡൻ്റ് ഉഷ എന്നിവർ സംസാരിച്ചു. 86 ഹരിതകർമസേനാംഗങ്ങളാണ് നഗരസഭയിലുള്ളത്. നഗരസഭ നൽകുന്ന 1250 രൂപയുൾപ്പെടെ 3500 രൂപയുടെ ബോണസ്, 600 രൂപ വിലമതിക്കുന്ന ഓണക്കിറ്റ്, ഓണക്കോടി എന്നിവയാണ് വിതരണംചെയ്‌തത്. സ്ഥിരംസമിതി അധ്യക്ഷരായ അഡ്വ. ഷാൻസി, കെ. ഉണ്ണിക്കൃഷ്‌ണൻ, സിഡിഎസ് അംഗം ശ്രീജ, ഹെൽത്ത് സൂപ്പർവൈസർ സി.കെ. വത്സൻ, ടി. രാജീവൻ എന്നിവർ പങ്കെടുത്തു.