വോട്ടുകൊള്ളക്കെതിരേ കോൺഗ്രസിൻ്റെ 'ഫ്രീഡം ലൈറ്റ്' നൈറ്റ് മാർച്ച്

മലപ്പുറം: വോട്ടുകൊള്ളക്കെതിരേ പോരാടുന്ന ലോക്‌സഭാ പ്രതിപക്ഷ നേതാവ് രാഹുൽഗാന്ധിക്ക് പിന്തുണയുമായി ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ മലപ്പുറത്ത് 'ഫ്രീഡം ലൈറ്റ് നൈറ്റ് മാർച്ച് നടത്തി.

മലപ്പുറം ഡിസിസി ഓഫീസ് പരിസരത്തുനിന്ന് തുടങ്ങി നഗരം ചുറ്റി കുന്നുമ്മൽ ജങ്ഷനിൽ സമാപിച്ചു. നൂറുകണക്കിനാളുകൾ തീപ്പന്തവുമേന്തി മാർച്ചിൽ പങ്കാളികളായി. ശേഷം നടന്ന പൊതുയോഗം കെപിസിസി വർക്കിങ് പ്രസിഡന്റ് എ.പി. അനിൽകുമാർ എംഎൽഎ ഉദ്ഘാടനം ചെയ്തു.

നാടിനുവേണ്ടിയുള്ള സമരമാണ് രാഹുൽഗാന്ധിയുടെ നേതൃത്വത്തിൽ കോൺഗ്രസ് നടത്തുന്നതെന്ന് അദ്ദേഹം പറഞ്ഞു. ഡിസിസി പ്രസിഡൻ്റ് അഡ്വ. വി.എസ്. ജോയ് അധ്യക്ഷനായി. ആര്യാടൻ ഷൗക്കത്ത് എംഎൽഎ, കോൺഗ്രസ് നേതാക്കളായ കെ.പി. നൗഷാദലി, ആലിപ്പറ്റ ജമീല, അബ്‌ദുൽ മജീദ്, വി. ബാബുരാജ്, റഷീദ് പറമ്പൻ, വി.എസ്.എൻ. നമ്പൂതിരി തുടങ്ങിയവർ പ്രസംഗിച്ചു.