ശംഖുംമുഖം ആറാട്ടുമണ്ഡപം സംരക്ഷിക്കാൻ ശ്രമം തുടങ്ങി

തിരുവനന്തപുരം ശംഖുംമുഖം തീരത്തെ ശ്രീപദ്‌മനാഭസ്വാമി ക്ഷേത്രത്തിന്റെ ആറാട്ടുമണ്ഡപം സംരക്ഷിക്കാൻ പ്രവർത്തനങ്ങൾ തുടങ്ങി. കൽമണ്ഡപത്തിനു മുന്നിലായി ജിയോബാഗുകൾ അടുക്കി കടലേറ്റത്തെ തടയാനുള്ള നടപടികളാണ് സ്വീകരിക്കുന്നത്.

കഴിഞ്ഞ കടലേറ്റത്തിൽ കൽമണ്ഡപത്തിനു സമീപംവരെ തിരകൾ എത്തിയിരുന്നു. ശ്രീപദ്‌മനാഭസ്വാമി ക്ഷേത്രത്തിലെ രണ്ട് ഉത്സവങ്ങൾക്കും ആറാട്ട് നടത്തുന്നത് ഈ മണ്ഡപത്തിൽവെച്ചാണ്.

ആന്റണി രാജു എംഎൽഎയുടെ ആസ്ത‌ിവികസന ഫണ്ടിൽനിന്ന് 35 ലക്ഷം രൂപ ചെലവഴിച്ചാണ് നിർമാണം നടത്തുന്നത്. മണ്ഡപത്തിന് 10 മീറ്റർ മുന്നിലായി 120 മീറ്റർ നീളത്തിലാണ് പോളി പ്രോപ്പലീൻ ജിയോബാഗുകൾ ഉപയോഗിച്ച് കടൽഭിത്തി നിർമിക്കുന്നത്. പദ്ധതി മൂന്നാഴ്‌ചയ്ക്കകം പൂർത്തിയാകുമെന്ന് ആന്റണി രാജു പറഞ്ഞു.