ചെങ്ങറ പുനരധിവാസ ഭൂപ്രശ്‌നങ്ങൾക്ക് പരിഹാരം58 കുടുംബങ്ങൾക്ക് പട്ടയം കൈമാറി

കാസർകോട് : ചെങ്ങറ പുനരധിവാസ പാക്കേജിൻ്റെ ഭാഗമായി അനുവദിച്ച

ഭൂമിയിൽ ഗുണഭോക്താക്കളുടെ ഭൂപ്രശ്‌നങ്ങൾ പരിഹരിച്ച് 58 കുടുംബങ്ങൾക്ക് പട്ടയം കൈമാറി. ഹൊസ്‌ദുർഗ് താലൂക്കിലെ പെരിയ ഗ്രാമത്തിലെ സർവേ നമ്പർ 341/1ൽ അനുവദിച്ച ഭൂമിയിലാണ് ഏറെനാളുകളായി നിലനിന്നിരുന്ന അനിശ്ചിതാവസ്ഥയ്ക്ക് അറുതിവരുത്തി പട്ടയങ്ങൾ വിതരണം ചെയ്തത്.

പട്ടികജാതി-പട്ടികവർഗ വികസന വകുപ്പിൻ്റെ നിയന്ത്രണത്തിലായിരുന്നു ഭൂമി. പട്ടയം അനുവദിച്ച 60 പേരിൽ പട്ടികജാതിക്കാർക്ക് 50 സെൻ്റ് വീതവും മറ്റു വിഭാഗങ്ങൾക്ക് 25 സെൻ്റ് വീതവും ഭൂമി നൽകി. ഇതിൽ പട്ടികജാതി വിഭാഗത്തിൽ പെട്ടവർക്ക് 42 സെൻ്റ് കൃഷി ആവശ്യങ്ങൾക്കും എട്ട് സെന്റ് കിടപ്പാട ആവശ്യങ്ങൾക്കും നൽകി. മറ്റു വിഭാഗക്കാർക്ക് നൽകിയ 25 സെന്റ്റ് ഭൂമിയിൽ എട്ട് സെൻ്റ് കിടപ്പാട ആവശ്യങ്ങൾക്കും 17 സെന്റ് കൃഷി ആവശ്യങ്ങൾക്കും വേണ്ടിയായിരുന്നു.

കാഞ്ഞങ്ങാട് ആർഡിഒയുടെ ചുമതല വഹിക്കുന്ന ബിനു ജോസഫ് പട്ടയം വിതരണം ചെയ്‌തു. ഹൊസ്‌ദുർഗ് തഹസിൽദാർ ജി. സുരേഷ് ബാബു അധ്യക്ഷത വഹിച്ചു. ഭൂരേഖ തഹസിൽദാർ വി. അശോകൻ, ഡെപ്യൂട്ടി തഹസിൽദാർമാരായ കെ. രമേഷ്, അനിൽ സി. ഫിലിപ്പ്, പെരിയ സ്പെഷ്യൽ വില്ലേജ് ഓഫീസർ കെ. രഞ്ജിനി എന്നിവർ സംസാരിച്ചു.