ബോണക്കാട് ലയങ്ങൾ തൊഴിലാളികൾക്കുള്ള പുതുവർഷ സമ്മാനം - മന്ത്രി പി.രാജീവ്

വിതുര ബോണക്കാട് ലയങ്ങൾ പുതുവർഷ സമ്മാനമായി തൊഴിലാളികൾക്ക് നൽകുമെന്ന് മന്ത്രി പി. രാജീവ്. ലയങ്ങളുടെ നവീകരണ നിർമാണോദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി. അടഞ്ഞുകിടക്കുന്ന ബോണക്കാട് എസ്റ്റേറ്റ് തുറന്നു പ്രവർത്തിപ്പിക്കാൻ സാധ്യമായത് ചർച്ച ചെയ്‌ത്‌ തീരുമാനിക്കുമെന്നും മന്ത്രി പറഞ്ഞു.

തൊഴിലാളികളുടെ ക്ഷേമം ഉറപ്പാക്കുക സർക്കാരിന്റെ പ്രഖ്യാപിത ലക്ഷ്യമാണെന്നും സുരക്ഷിതവും മാന്യവുമായ കിടപ്പാടം സർക്കാർ യാഥാർഥ്യമാക്കുമെന്നും അധ്യക്ഷനായ മന്ത്രി വി.ശിവൻകുട്ടി പറഞ്ഞു.

പ്ലാന്റേഷൻ വകുപ്പിൽനിന്നുള്ള 2 കോടിയും തൊഴിൽ വകുപ്പ് പ്ലാന്റേഷൻ വർക്കേഴ്‌സ് റിലീഫ് ഫണ്ടിൽ നിന്നുള്ള 2 കോടിയും ഉൾപ്പെടെ 4 കോടി ചെലവിലാണ് 43 ലയങ്ങളുടെ നവീകരണം നടത്തുന്നത്. 186 കുടുംബങ്ങൾക്കാണ് പ്രയോജനം ലഭിക്കുക.

ജില്ലാ നിർമിതി കേന്ദ്രത്തിനാണ് നിർമാണച്ചുമതല. ഡിസംബർ മാസത്തിൽ പണി പൂർത്തിയാക്കുമെന്നും മന്ത്രിമാർ അറിയിച്ചു. തൊഴിൽ വകുപ്പും വ്യവസായ വകുപ്പും സംയുക്തമായാണ് പദ്ധതി നടപ്പാക്കുന്നത്. അതിശോചനീയ അവസ്ഥയിൽ കഴിഞ്ഞിരുന്ന കുടുംബങ്ങളുടെ ഏറെക്കാലത്തെ വേദനയ്ക്കാണ് പരിഹാരമാകുന്നത്.

ജില്ലാ കളക്ടർ അനുകുമാരി പദ്ധതി വിശദീകരിച്ചു. ജി.സ്റ്റീഫൻ എംഎൽഎ. വിവിധ തദ്ദേശ സ്വയംഭരണ സ്ഥാപന പ്രതിനിധികൾ, വിവിധ ബഹുജന സംഘടനാ പ്രതിനിധികൾ, വിവിധ രാഷ്ട്രീയ പാർട്ടി പ്രതിനിധികൾ, ജില്ലാ ലേബർ ഓഫീസർ എ.ബിജു എന്നിവർ പങ്കെടുത്തു.