കേരളം വെല്ലുവിളികളെ നേരിട്ടത് ജനപങ്കാളിത്തത്തിലൂടെ -തോമസ് ഐസക്

കോഴിക്കോട് : നവ ഉദാരീകരണ നയങ്ങളുയർത്തിയ വെല്ലുവിളിനേരിടാൻ കേരളത്തിനുകഴിഞ്ഞത് അധികാരവികേന്ദ്രീകരണത്തിലൂടെയും ജനപങ്കാളിത്തത്തിലൂടെയുമാണെന്ന് മുൻ ധനമന്ത്രി ഡോ. ടി.എം. തോമസ് ഐസക് അഭിപ്രായപ്പെട്ടു.

പൊതു ആരോഗ്യം, പൊതുവിദ്യാഭ്യാസം എന്നീ മേഖലകളിൽ ഇത് വലിയ ഗുണഫലങ്ങളുണ്ടാക്കി. എന്നാൽ, കാർഷികമേഖലയിൽ ഈ നയങ്ങൾകാരണമുണ്ടായ തിരിച്ചടി ഫലപ്രദമായി നേരിടാനായിട്ടില്ലെന്നും അദ്ദേഹം പറഞ്ഞു.കേരള ശാസ്ത്രസാഹിത്യപരിഷത്തിൻ്റെ 'കേരളപഠനം 2.0' എന്ന പുസ്‌തകം പ്രൊഫ. കെ. ശ്രീധരനുനൽകി പ്രകാശനംചെയ്‌തശേഷം സംസാരിക്കുകയായിരുന്നു തോമസ് ഐസക്ക്.

2004-ലെ കേരളപഠനത്തിനുശേഷം 15 വർഷം കഴിഞ്ഞ് വീണ്ടും പരിഷത്ത് നടത്തിയ സാമൂഹ്യശാസ്ത്ര അന്വേഷണത്തിലെ കണ്ടെത്തലുകളാണ് പുസ്ത‌കത്തിലുൾപ്പെടുത്തിയിട്ടുള്ളത്.

കെ.പി. കേശവമേനോൻ ഹാളിൽനടന്ന ചടങ്ങിൽ പരിഷത്ത് സംസ്ഥാനപ്രസിഡൻ്റ് ടി.കെ. മീരാഭായ് അധ്യക്ഷയായി. ജനറൽസെക്രട്ടറി പി.വി. ദിവാകരൻ, പ്രൊഫ. ടി.പി. കുഞ്ഞിക്കണ്ണൻ, ഡോ. കെ.പി. അരവിന്ദൻ, കെ.ജെ. ജേക്കബ്, പി. ബിജു, കെ. വിനോദ്‌കുമാർ, പ്രദോഷ് കുനിശ്ശേരി എന്നിവർ സംസാരിച്ചു.