കുറിച്ചിയിൽ നാലുകിലോ കഞ്ചാവുമായി ഇതരസംസ്ഥാനക്കാർ പിടിയിൽ

കുറിച്ചി കുറിച്ചി-പൊൻപുഴ പൊക്കം റോഡരികിൽ നാലുകിലോ കഞ്ചാവുമായി നാല് ഇതരസംസ്ഥാന തൊഴിലാളികളെ പിടികൂടി. ഒഡീഷ സ്വദേശികളായ സുരേഷ് ബീറാ (22), ആകാശ് ബീറാ (19), അസം സ്വദേശികളായ ബിക്രം ബുയൻ (19), പരാഗ് ദത്ത (20) എന്നിവരെയാണ് ചിങ്ങവനം പോലീസും ജില്ലാ പോലീസ് മേധാവിയുടെ ലഹരിവിരുദ്ധ സംഘവും ചേർന്ന് ശനിയാഴ്ച രാവിലെ പിടികൂടിയത്. പൊൻപുഴ പൊക്കത്തിലെ വ്യവസായ മേഖല കേന്ദ്രീകരിച്ച് വ്യാപകമായി കഞ്ചാവ് വിൽപ്പന നടത്തുന്നതായി പോലീസിന് വിവരം ലഭിച്ചിരുന്നു. തുടർന്ന് പ്രദേശത്ത് നിരീക്ഷണം നടത്തി വരുന്നതിനിടെയാണ് കഞ്ചാവുമായി തൊഴിലാളികളെത്തിയത്. സംശയം തോന്നി ബാഗ് പരിശോധനയിൽ പ്ലാസ്റ്റിക്കിൽ പൊതിഞ്ഞ് ആറരക്കിലോ കഞ്ചാവ് കണ്ടെത്തി. ഇതരസംസ്ഥാനക്കാർക്ക് വിതരണത്തിനെത്തിച്ചതാണ് കഞ്ചാവെന്ന് പ്രതികൾ പോലീസിനോട് പറഞ്ഞു.