സാമൂഹികമാധ്യമത്തിൽ പ്രതികരിച്ച വിഎസ്എസ്‌സി ഉദ്യോഗസ്ഥന് സസ്പെൻഷൻ

തിരുവനന്തപുരം: ഭാരതാംബ വിവാദത്തിൽ സാമൂഹികമാധ്യമത്തിലൂടെ പ്രതികരിച്ച തുമ്പ വിക്രം സാരാഭായ് സ്പെയ്സ് സെന്റർ (വി.എസ്.എസ്‌സി) അഡ്മിനിസ്ട്രേറ്റീവ് സെക്ഷനിലെ ഉദ്യോഗസ്ഥന് സസ്പെൻഷൻ. കേന്ദ്രസർക്കാർ ജീവനക്കാരുടെ ഇടത് അനുകൂല സംഘടനയായ കോൺഫെഡറേഷൻ ഓഫ് സെൻട്രൽ ഗവ. സ്റ്റാഫ് ആൻഡ് വർക്കേഴ്സ് യൂണിയൻ സംസ്ഥാന സെക്രട്ടറി ജി.ആർ. പ്രമോദിനെയാണ് സസ്പെൻഡ് ചെയ്തത്.

ജൂണിൽ സാമൂഹികമാധ്യമത്തിലിട്ട കുറിപ്പാണ് നടപടിയിലേക്ക് നയിച്ചത്. 'ഏതെങ്കിലും ഒന്നിൽ ഉറച്ചുനിൽക്കടാ...' എന്ന തലക്കെട്ടിൽ ഭാരതാംബാ വിവാദത്തിൽ വിമർശനം ഉന്നയിച്ചാണ് കുറിപ്പ്. ഇത് വിവാദമായപ്പോൾ തുമ്പ സെന്ററിൽനിന്ന് എംവിഐടി വലിയമലയിലേക്ക് പ്രമോദിനെ സ്ഥലംമാറ്റിയിരുന്നു.

സസ്പെൻഷൻ പിൻവലിക്കണമെന്ന് ഐഎസ്ആർഒ സ്റ്റാഫ് അസോസിയേഷൻ ജനറൽ സെക്രട്ടറി ഇ.എസ്. ഹരീഷ്, പ്രസിഡൻ്റ് വി.എസ്. ശരത് കുമാർ എന്നിവർ ആവശ്യപ്പെട്ടു.